ഓട്ടോറിക്ഷ സ്ഫോടക വസ്തുവിന് മുകളിൽ;സ്കൂൾ കുട്ടികൾ രക്ഷപ്പെട്ടത് തലനാരിഴയ്ക്ക്

റോഡിൽ ഉപേക്ഷിച്ച നിലയിൽ കിടന്നിരുന്ന പന്നിപ്പടക്കമാണ് പൊട്ടിത്തെറിച്ചതെന്നാണ് പ്രാഥമിക നിഗമനം. ഓട്ടോയുടെ ടയർ ഇതിന് മുകളിലൂടെ കയറിയതോടെ വലിയ ശബ്ദത്തോടെ പൊട്ടിത്തെറിക്കുകയായിരുന്നു. സ്ഫോടനത്തിന്റെ ആഘാതത്തിൽ വലിയ ശബ്ദമുണ്ടായെങ്കിലും വാഹനത്തിന് നിയന്ത്രണം നഷ്ടമാകാതിരുന്നതും തീപിടുത്തം ഉണ്ടാകാതിരുന്നതും വൻ ദുരന്തം ഒഴിവാക്കി.

പ്രദേശത്ത് ഇത്തരം സംഭവങ്ങൾ ആവർത്തിക്കുന്നത് നാട്ടുകാരെ ആശങ്കയിലാക്കുന്നുണ്ട്. ഒരു മാസം മുൻപും സമാനമായ രീതിയിൽ പാതയോരത്ത് കിടന്ന പന്നിപ്പടക്കം പൊട്ടിത്തെറിച്ച് ഒരു വിദ്യാർഥിക്ക് പരിക്കേറ്റിരുന്നു. ജനവാസ മേഖലകളിലും റോഡുകളിലും സ്ഫോടക വസ്തുക്കൾ അശ്രദ്ധമായി കൈകാര്യം ചെയ്യുന്നവർക്കെതിരെ കർശന നടപടി വേണമെന്ന ആവശ്യം ശക്തമാണ്.