Hulk Hogan | WWE ഇതിഹാസതാരം ഹൾക്ക് ​ഹോ​ഗൻ ഹൃദയാഘാതത്തെ തുടർന്ന് അന്തരിച്ചു

WWE റെസലിം​ഗ് ഇതിഹാസ താരം ഹൾക്ക് ഹോ​ഗൻ അന്തരിച്ചു. 71 വയസ്സായിരുന്നു. വ്യാഴാഴ്ച പുലർച്ചെ ഫ്ലോറിഡയിലെ ക്ലിയർവാട്ടറിലെ ഹോ​ഗന്റെ വീട്ടിലായിരുന്നു അന്ത്യം. വീട്ടിൽ നിന്നും ഹൃദയസ്തംഭനം സംബന്ധിച്ച് എമര്‍ജന്‍സി ഫോണ്‍ കോള്‍ വന്നിരുന്നതായി ആരോഗ്യപ്രവര്‍ത്തകര്‍ പറഞ്ഞു.

വ്യാഴാഴ്ച രാവിലെ ഫ്ലോറിഡയിലെ ഹോ​ഗന്റെ വീട്ടിലേക്ക് അടിയന്തര സന്ദേശം ലഭിച്ചതിനെ തുടർന്ന് മെഡിക്കൽ സംഘം വീട്ടിൽ എത്തിയിരുന്നു. പിന്നാലെ ​ഹോ​ഗനെ സ്ട്രെച്ചറിൽ ആംബുലൻസിലേക്ക് മാറ്റിയിരുന്നു. എങ്കിലും ജീവൻ രക്ഷിക്കാൻ കഴിഞ്ഞില്ല.

ഏതാനും ആഴ്ചകൾക്ക് മുമ്പാണ് താരം കോമയിലാണെന്ന അഭ്യൂഹങ്ങൾ പടർന്നത്. ഈ വാർത്തകൾ ഹോഗന്റെ ഭാര്യ സ്‌കൈ തള്ളിക്കളഞ്ഞ് ആഴ്ചകള്‍ പിന്നിടുമ്പോഴാണ് മരണം. ആഴ്ചകൾക്ക് മുമ്പായിരുന്നു ഹൾക്കിൻ‌റെ ഹൃദയ ശസ്ത്രക്രിയ കഴിഞ്ഞത്. ശസ്ത്രക്രിയ്ക്കുശേഷം സുഖംപ്രാപിച്ചുവരുകയാണെന്നും ഭാര്യ അറിയിച്ചിരുന്നു.

ഹൾക്കിന്റെ മൂന്നാം ഭാര്യയാണ് സ്‌കൈ. 1983-ലായിരുന്നു ഹൾ‌ക്കിന്റെ ആദ്യ വിവാഹം. ഭാര്യ ലിൻഡയുമായുള്ള ബന്ധം 26 വര്‍ഷം നീണ്ടു നിന്നു. എന്നാൽ 2009-ല്‍ ഇരുവരും വേർപിരിഞ്ഞു. തൊട്ടടുത്ത വര്‍ഷംതന്നെ ഹള്‍ക്കിന്റെ രണ്ടാം വിവാഹവും നടന്നു. ജെന്നിഫര്‍ മക്ഡാനിയലായിരുന്നു രണ്ടാം ഭാര്യ. എന്നാല്‍ 11 വര്‍ഷത്തിന് ശേഷം 2021-ല്‍ ഇരുവരും വിവാഹമോചനം നേടി. ഇതിന് ശേഷം 2023-ലാണ് യോ​ഗ ഇൻസ്ട്രക്ടറായ സ്കൈ ഡെയ്ലിയെ വിവാഹം കഴിച്ചത്.

1953 ഓഗസ്റ്റ് 11 ന് ജോർജിയയിലെ അഗസ്റ്റയിൽ ജനിച്ച ഹൾക്ക് ഹോ​ഗന്റെ യഥാർത്ഥ പേര് ടെറി ജീന്‍ ബൊലിയ എന്നാണ്. 1980 കളിലും 1990 കളുടെ തുടക്കത്തിലുമാണ് റസിലിം​ഗിൽ ഏറ്റവും ശ്രദ്ധേയനായി ഹൾക്ക് മാറിയത്.

മഞ്ഞയും ചുവപ്പും നിറങ്ങളിലുള്ള അദ്ദേഹത്തിന്റെ വേഷവും "വാച്ച് യാ ഡൂയിൻ', ബ്രദർ!" പോലുള്ള ക്യാച്ച്‌ഫ്രേസുകളിലൂടെയുമാണ് ഹൾക്ക് ലോക ശ്രദ്ധ പിടിച്ചുപറ്റിയത്. ഹോ​ഗൻ തൻ്റെ വ്യക്തിത്വവും ആകർഷകത്വവും അതുല്യമായ ആരാധകവൃന്ദത്തിലൂടെയും ഡബ്ല്യൂ ഡബ്ല്യൂ ഇ (അന്നത്തെ ഡബ്ല്യൂ ഡബ്ല്യൂ എഫ്) ആഗോളതലത്തിൽ ജനപ്രിയമാക്കുന്നതിൽ വലിയ പങ്ക് വഹിച്ചിരുന്നു.