'ലാലേട്ടന്‍റെയും മമ്മൂക്കയുടെയും സ്ട്രാറ്റര്‍ജിയാണ് ഞാന്‍ കോപ്പിയടിക്കുന്നത്'; ടൊവിനോ തോമസ്

വളരെ ചുരുങ്ങിയ കാലം കൊണ്ടു തന്നെ മലയാള സിനിമയില്‍ തന്‍റെതായ ഇടം കണ്ടെത്തിയ നടനാണ് ടോവിനോ തോമസ്. മിന്നല്‍ മുരളിയിലൂടെ മലയാളത്തിന് പുറത്തും ശ്രദ്ധനേടിയ ടോവിനോ മാരി 2ലൂടെ തമിഴിലും അരങ്ങേറ്റം കുറിച്ചിരുന്നു

ഓസ്കാര്‍ നോമിനേഷന്‍ നേടിയ ജൂഡ് ആന്‍റണി ചിത്രം 2018  ലെ അനൂപ് എന്ന കഥാപാത്രം ടോവിനോയ്ക്ക് കൂടുതല്‍ ജനപ്രീതി നേടിക്കൊടുക്കുകയും ചെയ്തു.

പക്കാ കൊമേഷ്യല്‍ സിനിമകള്‍ക്കൊപ്പം കലാമൂല്യമുള്ള, തന്നിലെ നടന് മുതല്‍ കൂട്ടാകുന്ന സിനിമയും കഥാപാത്രങ്ങളും തെരഞ്ഞെടുക്കുകയാണ് ടോവിനോ തോമസ്. 

ഡോ. ബിജു രചനയും സംവിധാനവും ചെയ്യുന്ന അദൃശ്യജാലകങ്ങള്‍ എന്ന ചിത്രത്തിലൂടെയാണ് ടോവിനോ ആര്‍ട്ട് സിനിമകളുടെ ഭാഗമാകുന്നത്. സിനിമയുടെ ആദ്യ പ്രദര്‍ശനം  27-ാമത് ടാലിൻ ബ്ലാക്ക് നൈറ്റ്സ് ഇന്റർനാഷണൽ ഫിലിം ഫെസ്റ്റിവലിൽ വച്ച് നടന്നു.

കൊമേഴ്ഷ്യൽ സിനിമകള്‍ക്കൊപ്പം കലാമൂല്യമുള്ള ചിത്രങ്ങളും ചെയ്തിരുന്ന മമ്മൂട്ടിയുടെയും മോഹൻലാലിന്റെയും സ്ട്രാറ്റജി തന്നെയാണ് താനും പിന്തുടരുന്നതെന്ന് ടൊവിനോ തോമസ് അടുത്തിടെ പറഞ്ഞിരുന്നു.

സിനിമയിൽ അങ്ങനെ ഒരു ബാലൻസ് ഉണ്ടായിരുന്നതുകൊണ്ടാണ് അവർ ബുർജ് ഖലീഫയാകാതെ മൗണ്ട് എവറസ്റ്റായതെന്നും ടൊവിനോ പറഞ്ഞു. ഫിലിം കംപാനിയന് നൽകിയ അഭിമുഖത്തിലായിരുന്നു നടന്‍റെ പ്രതികരണം.

'80കളിൽ മോഹൻലാലും മമ്മൂക്കയും ജോഷിയുടെയും ഐ.വി. ശശിയുടെയും സിനിമകളും അടൂരിന്റെയും അരവിന്ദന്റെയും പടങ്ങൾ മാറിമാറി ചെയ്യും.

 അതേ സ്ട്രാറ്റജിയാണ് ഞാൻ കോപ്പിയടിക്കുന്നത്. ഇത്രയും സക്സസ്ഫുള്ളായവർ എന്തായാലും കരിയറിൽ ചെയ്തത് മണ്ടത്തരങ്ങളാവില്ലല്ലോ.

സ്റ്റാർഡം മാത്രം നോക്കി പോയിരുന്നെങ്കിൽ അവർ ബുർജ് ഖലീഫയായി പോയേനേ. പക്ഷേ അവരിപ്പോൾ നിൽക്കുന്നത് മൗണ്ട് എവറസ്റ്റായാണ്. ഒരു കാറ്റിലും വീഴില്ല. ബുർജ് ഖലീഫയും എവറസ്റ്റും തമ്മിൽ വ്യത്യാസമുണ്ടല്ലോ എന്നും താരം പറഞ്ഞു.