കോളേജ് പഠനം ഉപേക്ഷിച്ച് ട്രക്ക് ഡ്രൈവറായി; 9000 കോടിയുടെ സമ്പത്തിന് ഉടമ; ഒരേ ചിത്രത്തിന് മൂന്ന് ഓസ്കാർ നേടിയ സംവിധായകൻ!

ജീവിതം എന്നും ഒരേപോലെ തുടരില്ല എന്നതിന് ജെയിംസ് കാമറൂണിനേക്കാൾ (James Cameron) വലിയ ഉദാഹരണം വേറെയുണ്ടാകില്ല. ഇന്ന് ലോകസിനിമയെ സാങ്കേതികമായി വിസ്മയിപ്പിക്കുന്ന ശതകോടീശ്വരനായ ഈ സംവിധായകൻ ഒരുകാലത്ത് കോളേജ് പഠനം ഉപേക്ഷിച്ച് ഉപജീവനത്തിനായി ലോറി ഓടിച്ചിരുന്ന ആളായിരുന്നു എന്ന് കേട്ടാൽ ആരും വിശ്വസിക്കില്ല. എന്നാൽ യഥാർത്ഥ ജീവിതം പലപ്പോഴും സിനിമയേക്കാൾ അതിശയകരമാണ്.

1954-ൽ കാനഡയിൽ ജനിച്ച ജെയിംസ് കാമറൂൺ ഭൗതികശാസ്ത്രം പഠിക്കാനാണ് കോളേജിൽ ചേർന്നതെങ്കിലും അത് പാതിവഴിയിൽ ഉപേക്ഷിച്ചു. ട്രക്ക് ഡ്രൈവറായും സ്കൂൾ തൂപ്പുകാരനായും ജോലി ചെയ്യുന്നതിനിടയിലും സിനിമ എന്ന സ്വപ്നം അദ്ദേഹം ഉപേക്ഷിച്ചിരുന്നില്ല. ലൈബ്രറികളിൽ പോയി ഫിലിം ടെക്നോളജിയെക്കുറിച്ച് സ്വയം പഠിച്ചു. 1977-ൽ 'സ്റ്റാർ വാർസ്' എന്ന ചിത്രം കണ്ടതാണ് അദ്ദേഹത്തിന്റെ ജീവിതം മാറ്റിമറിച്ചത്. ആവേശഭരിതനായ അദ്ദേഹം ഉടൻ തന്നെ ട്രക്ക് ഡ്രൈവർ ജോലി ഉപേക്ഷിക്കുകയും ആഴ്ചയിൽ 175 ഡോളറിന് ഒരു സിനിമാ കമ്പനിയിൽ ജോലിക്ക് ചേരുകയും ചെയ്തു.

1981-ൽ 'പിരാന 2' എന്ന ചിത്രത്തിലൂടെയാണ് അദ്ദേഹം സംവിധാന രംഗത്തേക്ക് കടന്നതെങ്കിലും അത് പൂർത്തിയാകും മുൻപേ അദ്ദേഹത്തെ പുറത്താക്കി. എന്നാൽ തോറ്റു കൊടുക്കാൻ അദ്ദേഹം തയ്യാറായിരുന്നില്ല. 1984-ൽ 'ദി ടെർമിനേറ്റർ' എന്ന ചിത്രം പുറത്തിറങ്ങിയതോടെ കാമറൂൺ എന്ന പേര് ലോകം ശ്രദ്ധിച്ചു. വെറും 6 മില്യൺ ഡോളറിൽ നിർമ്മിച്ച ആ ചിത്രം 78 മില്യൺ ഡോളറാണ് വാരിക്കൂട്ടിയത്.

പിന്നീട് അദ്ദേഹം സൃഷ്ടിച്ചതൊക്കെയും ചരിത്രമായിരുന്നു.1997 ൽ പുറത്തിറങ്ങിയ ടൈറ്റാനിക് എന്ന ചിത്രമാണ് അദ്ദേഹത്തിന്റെ കരിയറിന്റെ വഴിത്തിരിവ്. 2009 ൽ സിനിമാ സങ്കൽപ്പങ്ങളെ തന്നെ മാറ്റിമറിച്ച ഗ്രാഫിക്സ് വിസ്മയമായ അവതാർ പുറത്തിറങ്ങി. അടുത്തിടെ പുറത്തിറങ്ങിയ അവതാർ: ഫയർ ആൻഡ് ആഷ് വെറും മൂന്ന് ദിവസം കൊണ്ട് 3000 കോടിയിലധികം രൂപയാണ് കളക്ട് ചെയ്തത്.

ഫോർബ്‌സിന്റെ കണക്കനുസരിച്ച് ഏകദേശം 1.1 ബില്യൺ ഡോളർ (ഏകദേശം 9000 കോടിയിലധികം രൂപ) ആസ്തിയുള്ള ലോകത്തിലെ ഏറ്റവും സമ്പന്നനായ സംവിധായകരിൽ ഒരാളാണ് അദ്ദേഹം ഇന്ന്. തന്റെ സിനിമകളിലൂടെ മാത്രം ഏകദേശം 9 ബില്യൺ ഡോളറാണ് അദ്ദേഹം ലോകവിപണിയിൽ നിന്ന് നേടിയത്.

പലരും അസാധ്യമെന്ന് കരുതിയ സ്വപ്നങ്ങൾ സാങ്കേതിക വിദ്യയുടെ സഹായത്തോടെ സ്ക്രീനിൽ എത്തിച്ച കാമറൂൺ, പ്രതിസന്ധികളിൽ തളരുന്നവർക്ക് വലിയൊരു പ്രചോദനമാണ്. ഒരുകാലത്ത് ലോറി ഓടിച്ചിരുന്ന കൈകൾ ഇന്ന് ലോകസിനിമയുടെ ഗതി നിയന്ത്രിക്കുന്നു എന്നതുതന്നെയാണ് അദ്ദേഹത്തിന്റെ ജീവിതത്തിലെ ഏറ്റവും വലിയ 'ട്വിസ്റ്റ്'.