കൊൽക്കത്ത കോളജ് പ്രവേശനം; മെറിറ്റ് പട്ടികയിൽ ഒന്നാമത് 'സണ്ണി ലിയോണി'

ബിജെപി നേതാവും ബോളിവുഡ് താരവുമായ സണ്ണി ഡിയോളിന്റെ പേരിനു പകരം അബദ്ധത്തിൽ സണ്ണി ലിയോണിയുടെ പേര് വന്നത് നേരത്തെ വാർത്തകളായിരുന്നു.

ഇപ്പോഴിതാ കോളജ് പ്രവേശനത്തിനുള്ള മെറിറ്റ് പട്ടികയിൽ ഒന്നാം സ്ഥാനത്ത് എത്തിയിരിക്കുകയാണ് ബോളിവുഡ് താരം സണ്ണി ലിയോണി.

കൊൽക്കത്ത അശുതോഷ് കോളജ് ഓൺലൈനിൽ പ്രസിദ്ധീകരിച്ച പട്ടികയിലാണ് താരത്തിന്‍റെ പേരുള്ളത്.

ബിഎ ഇംഗ്ലീഷ്(ഓണർ) പ്രവേശനത്തിനുള്ള ആദ്യ പട്ടികയിലാണ് താരത്തിൻറെ പേരും ഇടംനേടിയത്. വ്യാഴാഴ്ചയാണ് പട്ടിക പുറത്തുവിട്ടത്.

ആപ്ലിക്കേഷൻ ഐഡി, റോൾ നമ്പർ എന്നിവ സഹിതമാണ് പേര് പട്ടികയിലുള്ളത്. പേരിന് പുറമെ പ്ലസ് ടു പരീക്ഷയിൽ നാല് വിഷയങ്ങൾക്ക് ഫുൾ മാർക്ക് നേടിയിട്ടുണ്ടെന്നും ഇതിൽ വ്യക്തമാക്കുന്നു.

അതേസമയം ആരോ മനഃപൂർവം ചെയ്തതാണിതെന്നാണ് കോളജിന്റെ വിശദീകരണം.

കുഴപ്പങ്ങള്‍ ഉണ്ടാക്കുന്നതിന് സണ്ണി ലിയോണിയുടെ പേരിൽ ആരെങ്കിലും മനഃപൂർവ്വം തെറ്റായ അപേക്ഷ സമർപ്പിച്ചതായിരുക്കുമെന്നാണ് കോളജ് അധികൃതര്‍ പറയുന്നത്.

ഇത് തിരുത്താൻ ബന്ധപ്പെട്ട വകുപ്പിനോട് ആവശ്യപ്പെട്ടിട്ടുണ്ടെന്നും സംഭവത്തെക്കുറിച്ച് അന്വേഷണം നടത്തുമെന്നും കോളജ് അധികൃതർ പറഞ്ഞു.

ബിജെപിയിൽ ചേർന്ന സണ്ണി ഡിയോളിനു പകരം ലോക്‌സഭാ തെരഞ്ഞെടുപ്പ് 2019 ൽ 'സണ്ണി ലിയോണി' നയിക്കുമെന്ന് വാർത്താ അവതാരകൻ അബദ്ധത്തിൽ പറഞ്ഞത് നേരത്തെ വൈറലായിരുന്നു. സമാനമായി മുമ്പ് ബിഹാർ പിഎച്ച്ഇഡി ജൂനിയർ എൻജിനീയർ പരീക്ഷ ഫലം പ്രസിദ്ധീകരിച്ച പട്ടികയിൽ സണ്ണി ലിയോണി ഒന്നാം റാങ്ക് നേടിയിരുന്നു.