കാമുകനൊപ്പം ചേർന്ന് പെൺകുട്ടിയുടെ തട്ടിക്കൊണ്ട് പോകൽ നാടകം; വീട്ടുകാരോട് ഒരു കോടി രൂപ ആവശ്യപ്പെട്ടു

ആഗ്ര: കാമുകനൊപ്പം ചേർന്ന് തട്ടിക്കൊണ്ട് പോകൽ നാടകം നടത്തി വീട്ടുകാരോട് ഒരു കോടി രൂപ ആവശ്യപ്പെട്ട പത്തൊമ്പതുകാരി അറസ്റ്റിൽ. മഹാരാഷ്ട്രാ പൊലീസിന്റെ പരിധിയിലുള്ള ഏട്ടാ ജില്ലയിലെ നഗ്ലബാഞ്ച ഗ്രാമത്തിലാണ് സംഭവം ഉണ്ടായത്.

വ്യാഴാഴ്ച രാത്രി മുതലാണ് പെൺകുട്ടിയെ കാണാതായതെന്ന് പൊലീസ് പറഞ്ഞു. പിന്നാലെ പണം ആവശ്യപ്പെട്ടുകൊണ്ട് പെൺകുട്ടിയുടെ ഫോണിൽ നിന്ന് നിരവധി തവണ രക്ഷിതാക്കളുടെ ഫോണിലേക്ക് കോൾ വന്നു. ഇവർ പൊലീസിൽ പരാതി നൽകുകയായിരുന്നു.

തുടർന്ന് നടത്തിയ അന്വേഷണത്തിൽ ശനിയാഴ്ച പെൺകുട്ടിയുടെ വീടിനടുത്തുള്ള കൃഷിയിടത്തിൽ നിന്ന് പൊലീസ് ഇവരെ കണ്ടെത്തി. ഇവർക്കൊപ്പമുണ്ടായിരുന്ന കാമുകൻ ഓടി രക്ഷപ്പെട്ടു.

പെൺകുട്ടിയും യുവാവും അയൽവാസികളാണ്. രണ്ട് വർഷത്തോളമായി ഇവർ പ്രണയത്തിലായിരുന്നു. എന്നാൽ പെൺകുട്ടിയുടെ കുടുംബം ഈ ബന്ധത്തിന് എതിരായിരുന്നു.

ഒരു കോടി രൂപ നിക്ഷേപിച്ച് മാതാപിതാക്കള്‍ സ്കൂൾ നടത്താൻ പോകുന്നുവെന്ന് പെൺകുട്ടി അടുത്തിടെ മനസിലാക്കി. ഇതിനു പിന്നാലെ പണം കൈക്കലാക്കി ഒളിച്ചോടാൻ ഇരുവരും ചേർന്ന് പദ്ധതി തയ്യാറാക്കുകയായിരുന്നു.

അർധ രാത്രി വീട്ടിൽ നിന്ന് ഇറങ്ങിപ്പോയ ശേഷം പണം ആവശ്യപ്പെട്ട് വീട്ടുകാരെ ശബ്ദം മാറ്റി വിളിച്ചത് പെൺകുട്ടിയാണ്. അന്വേഷണത്തിന്റെ തുടക്കത്തിൽ തന്നെ ചില സംശയങ്ങൾ തോന്നിയെന്ന് പൊലീസ് പറഞ്ഞു.

ഏതെങ്കിലും ഗുണ്ടാസംഘങ്ങളാകും സംഭവത്തിന് പിന്നിലെന്നാണ് പൊലീസ് ആദ്യംകരുതിയത്. എന്നാൽ പണം ആവശ്യപ്പെട്ട് തുടരെ തുടരെ വിളിച്ചതും ധൃതി കാണിച്ചതും സംശയം വർധിപ്പിച്ചു. പെൺകുട്ടിയുടെ മൊബൈൽ ഫോൺ ലൊക്കേഷൻ കണ്ടെത്തുകയും ചെയ്തു- പൊലീസ് പറഞ്ഞു.

ചോദ്യം ചെയ്യലിലാണ് തട്ടിക്കൊണ്ട് പോകൽ നാടകത്തെ കുറിച്ച് പെൺകുട്ടി വ്യക്തമാക്കിയത്. സംഭവത്തിൽ രണ്ടുപേർക്കെതിരേയും കേസെടുത്തതായും ഒളിവിൽ പോയ കാമുകന് വേണ്ടി തിരച്ചിൽ തുടരുകയാണെന്നും പൊലീസ് പറഞ്ഞു.