യുപിയിൽ കാണാതായ 15 കാരിയുടെ മൃതദേഹം അഴുകിയ നിലയിൽ; കൊലപാതകം വസ്തുതർക്കത്തെ തുടർന്നെന്ന് പൊലീസ്

ലക്നൗ: ഹത്രാസ് സംഭവത്തിന് പിന്നാലെ യുപിയിൽ നിന്ന് വീണ്ടും ദുഃഖകരമായ വാർത്ത. രണ്ടാഴ്ചമുൻപ് കാണാതായ 15കാരിയുടെ ജീർണിച്ച മൃതദേഹം ചോളപ്പാടത്തിൽ കണ്ടെത്തി. കാൺപൂർ ദേഹാതിലാണ് സംഭവം.

സ്വത്തുതർക്കമാണ് കുട്ടിയുടെ കൊലപാതകത്തിലേക്ക് നയിച്ചതെന്ന് പൊലീസ് പറയുന്നു. അമ്മാവന്മാർ പെൺകുട്ടിയെ തട്ടിക്കൊണ്ടുപോയി അതിക്രൂരമായി കൊലപ്പെടുത്തുകയായിരുന്നുവെന്ന് കാൺപൂർ ദേഹാത് എസ്.പി. കേശവ് കുമാർ ചൗധരി പറഞ്ഞു.

പെൺകുട്ടിയുടെ ഗ്രാമമായ ഗഹോലിയയിൽ നിന്ന് അരകിലോമീറ്റർ അകലെയുള്ള ചോളപ്പാടത്തിൽ സമീപവാസികളാണ് മൃതദേഹം കണ്ടെത്തിയത്. മൃതദേഹം അഴുകിയ നിലയിലായിരുന്നു. ശരീരത്തിന്റെ ഭാഗങ്ങൾ തെരുവ് നായ്ക്കളോ മറ്റോ ഭക്ഷിച്ച നിലയിലായിരുന്നുവെന്നും പൊലീസ് പറഞ്ഞു.

എന്നാൽ, കൊല്ലപ്പെടുന്നതിന് മുൻപ് പെൺകുട്ടി ബലാത്സംഗം ചെയ്യപ്പെട്ടുവെന്ന് രക്ഷിതാക്കൾ പറഞ്ഞതായി എൻഡിടിവി റിപ്പോർട്ട് ചെയ്യുന്നു. എന്നാൽ പൊലീസ് ഇതു തള്ളിക്കളയുന്നു.

മൃതദേഹം പോസ്റ്റ്മോർട്ടത്തിനായി അയച്ചിട്ടുണ്ടെന്ന് പൊലീസ് അറിയിച്ചു. രണ്ടാഴ്ച മുൻപാണ് പെൺകുട്ടിയെ കാണാതായത്. ഒരാഴ്ച മുൻപ് രക്ഷിതാക്കൾ പൊലീസിൽ പരാതിയും നൽകി.

സംഭവവുമായി ബന്ധപ്പെട്ട് പെൺകുട്ടിയുടെ രണ്ട് അമ്മാവന്മാരെ അറസ്റ്റ് ചെയ്തതായി പൊലീസ് പറഞ്ഞു. ബ്രിജ് ലാൽ (65), ജിയ ലാൽ (60) എന്നിവരാണ് അറസ്റ്റിലായത്. സ്വത്തുതർക്കത്തെ തുടർന്ന് കൊല നടത്തുകയായിരുന്നുവെന്ന് ഇവർ സമ്മതിച്ചതായി പൊലീസ് പറയുന്നു.