ജയിംസ് ബോണ്ട് മാതൃകയില്‍ കെജിഎഫിന് തുടര്‍ച്ച; നായകന്‍ മാറിയേക്കും, മൂന്നാം ഭാഗം 2025ല്‍ ആരംഭിക്കും

ഇന്ത്യന്‍ ബോക്സ് ഓഫീസില്‍ വീശിയടിച്ച കൊടുങ്കാറ്റായിരുന്നു പ്രശാന്ത് നീല്‍ - യാഷ് ടീമിന്‍റെ കെജിഎഫ് . കര്‍ണാടകയിലെ കോളാര്‍ ഗോള്‍ഡ് ഫീല്‍ഡിന്‍റെ പശ്ചാത്തലത്തില്‍ ഒരുക്കിയ ഈ മാസ് ആക്ഷന്‍ ത്രില്ലര്‍ ചിത്രം. രണ്ട് ഭാഗങ്ങളായാണ് തീയേറ്ററിലെത്തിയത്. ഇപ്പോഴിതാ സിനിമയെ സംബന്ധിച്ച പല സുപ്രധാന വിവരങ്ങള്‍ പുറത്തുവിട്ടിരിക്കുകയാണ് നിര്‍മ്മാതാക്കളായ ഹോംബാലെ ഫിലിംസ്.

കെജിഎഫിന്‍റെയും നായകന്‍ റോക്കിയുടെയും കഥ തുടരുമെന്ന സൂചന നല്‍കിയാണ് സിനിമയുടെ രണ്ടാം ഭാഗം അവസാനിച്ചത്. കെജിഎഫ് മൂന്നാം ഭാഗത്തെ കുറിച്ചുള്ള കൂടുതല്‍ വിവരങ്ങള്‍ നിര്‍മ്മാതാവ് വിജയ് കിരഗൊണ്ടൂര്‍ അടുത്തിടെ പങ്കുവെച്ചിരുന്നു.

കെജിഎഫിന്‍റെ മൂന്നാം ഭാഗത്തിനായി ഇനിയും ഏറെ നാള്‍ കാത്തിരിക്കേണ്ടിവരും.. സംവിധായകന്‍ പ്രശാന്ത് നീല്‍ അദ്ദേഹത്തിന്‍റെ പുതിയ സിനിമയായ സലാറിന്‍റെ തിരക്കുകളിലാണ്. അതിന് ശേഷം മാത്രമേ കെജിഎഫ്. മൂന്നാം ഭാ​ഗമുണ്ടാവൂ എന്നും അത് ചിലപ്പോൾ 2025-ലായിരിക്കുമെന്നും വിജയ് പറഞ്ഞു.

വിചാരിച്ചത് പോലെ എല്ലാം നടന്നാല്‍ 2026-ലായിരിക്കും കെ.ജി.എഫ് 3 റിലീസ് ചെയ്യുക. യഷ് നായകനായി കെ.ജി.എഫിന് അഞ്ച് ഭാ​ഗങ്ങളുണ്ടാകും. അഞ്ചാം ഭാ​ഗത്തിന് ശേഷം പുതിയൊരു നായകനെ വെച്ച് ഇതേ ചിത്രത്തിന്റെ തുടർച്ചകളുണ്ടാവുമെന്നും അദ്ദേഹം വെളിപ്പെടുത്തി. 

ഹോളിവുഡിൽ ജെയിംസ് ബോണ്ട് ചിത്രങ്ങളെ മാതൃകയാക്കിയാകും നായകനെ മാറ്റുന്നത്. വിജയ് കിര​ഗണ്ടൂർ പറഞ്ഞു. ഹോംബാലെ പ്രൊഡക്ഷൻസിലെ മറ്റൊരു നിർമാതാവായ കാർത്തിക് ​ഗൗഡയും കെ.ജെ.എഫ് 3 വൈകുമെന്ന് അറിയിച്ചിരുന്നു.