Kriti Sanon | ഗോള്‍ഡ് ഖാദി ബ്ലോക് പ്രിന്‍റില്‍ കേരള സാരിയണിഞ്ഞ് അതിസുന്ദരിയായി കൃതി സനോണ്‍

ഇന്ത്യന്‍ സിനിമാ ലോകം കാത്തിരിക്കുന്ന പ്രഭാസിന്‍റെ ആദിപുരുഷ് ജൂണ്‍ 16ന് തിയേറ്ററുകളിലെത്തുകയാണ്. സ്ക്രീനില്‍ രാമനായി പ്രഭാസും രാവണനായി സെയ്ഫ് അലി ഖാനും എത്തുമ്പോള്‍ സീതയായി വേഷമിട്ടിരിക്കുന്നത് കൃതി സനോണ്‍ ആണ്.

മോഡലിങ്ങിലൂടെ സിനിമയിലെത്തിയ കൃതിയുടെ സിനിമാ കരിയറിലെ ഏറ്റവും പ്രധാനപ്പെട്ട കഥാപാത്രമാണ് ആദിപുരുഷിലെ സീത. കഴിഞ്ഞ ദിവസം നടന്ന സിനിമയുടെ ട്രെയിലര്‍ ലോഞ്ചിനെത്തിയ നടിയുടെ അതിമനോഹരമായ ലുക്കില്‍ പലരുടെയും കണ്ണ് ഉടക്കിയിരുന്നു.

സെലിബ്രിറ്റി ഡിസൈനര്‍മാരായ അബുജാനി സന്ദീപ് ഖോസ്‌ല എന്നിവര്‍ ഡിസൈന്‍ ചെയ്ത സാരിയാണ് ചടങ്ങിലെ കൃതിയുടെ ലുക്കിന് മാറ്റുകൂട്ടിയത്.സര്‍ദോസി ബോര്‍ഡറുള്ള വെള്ള ഖാദി സാരി അണിഞ്ഞെത്തിയ കൃതി ഇതിനൊപ്പം കേരള കോട്ടണ്‍ സാരി ദുപ്പട്ട പോലെ ധരിച്ചു.

24 കാരറ്റ് ഗോള്‍ഡ് ഖാദി ബ്ലോക്ക് പ്രിന്റാണ് കേരള സാരിയുടെ സവിശേഷത. ചുവപ്പും ഗോള്‍ഡന്‍ നിറവും ചേര്‍ന്ന വര്‍ക്കുകള്‍ സാരിക്ക് റിച്ച് ലുക്ക് നല്‍കി. മസ്റ്റാര്‍ഡ് നിറത്തിലുള്ള രേഷം (ഒരു പ്രത്യേകതരം നൂല്) എംബ്രോയ്ഡറി വര്‍ക്ക് ചെയ്ത, പ്രിന്റഡ് ബ്ലൗസ് ആയിരുന്നു സാരിക്കൊപ്പം പെയര്‍ ചെയ്തത്.

ഇതിനൊപ്പം മുടിയില്‍ പൂ ചൂടി മരതക ആഭരണങ്ങള്‍ അണിയുകയും ചെയ്ത കൃതിയുടെ മനോഹരമായ ചിത്രങ്ങള്‍ സോഷ്യല്‍ മീഡിയയില്‍ തരംഗമായി. ഏറ്റവും ശുദ്ധമായ തുണിയാണ് സാരിക്ക് വേണ്ടി നിര്‍മിച്ചതെന്ന് അബുജാനി സന്ദീപ് ഖോസ്‌ല പോസ്റ്റില്‍ പറയുന്നു.

കൃതിയുടെ ഏറ്റവും മികച്ച ലുക്ക് ആണ് ഇതെന്നും ഈ വസ്ത്രത്തില്‍  ഐശ്വര്യം നിറഞ്ഞുനില്‍ക്കുന്നുവെന്നും ആരാധകര്‍  ചിത്രത്തിന് കമന്റ് ചെയ്തിട്ടുണ്ട്.