മമ്മൂട്ടി-ജ്യോതിക ചിത്രം കാതൽ ദ കോറിന് രണ്ട് ഗൾഫ് രാജ്യങ്ങളിൽ പ്രദർശിപ്പിക്കാൻ വിലക്ക്?

കണ്ണൂർ സ്ക്വാഡ് എന്ന ചിത്രത്തിന് ശേഷം മറ്റൊരു മമ്മൂട്ടി ചിത്രം കൂടി പ്രദർശനത്തിനെത്തുകയാണ്. ഹിറ്റ് മേക്കർ ജിയോ ബേബി ഒരുക്കി കാതൽ ദ കോർ എന്ന ചിത്രമാണ് നവംബർ 23ന് റിലീസ് ചെയ്യുന്നത്. മമ്മൂട്ടിക്കൊപ്പം തെന്നിന്ത്യൻ താരം ജ്യോതികയാണ് ഈ ചിത്രത്തിൽ നായികയായി അഭിനയിച്ചിട്ടുള്ളത്.

ഒട്ടേറെ സവിശേഷതകളുമായാണ് കാതൽ ദ കോർ എന്ന ചിത്രം പ്രദർശനത്തിനെത്തുന്നത്. 12 വർഷത്തിനുശേഷം ജ്യോതിക അഭിനയിക്കുന്ന മലയാള സിനിമ എന്നതാണ് ഏറ്റവും വലിയ പ്രത്യേകത.

അതിനിടെ രണ്ട് ഗൾഫ് രാജ്യങ്ങൾ കാതൽ ദ കോർ എന്ന ചിത്രം പ്രദർശിപ്പിക്കുന്നതിന് വിലക്ക് ഏർപ്പെടുത്തിയെന്ന വിവരമാണ് ഇപ്പോൾ പുറത്തുവരുന്നത്. കുവൈറ്റ്, ഖത്തർ എന്നീ രാജ്യങ്ങളാണ് ചിത്രം വിലക്കിയത്. ചലച്ചിത്ര പ്രവർത്തകനായ എ ബി ജോർജ് ആണ് ഇക്കാര്യം എക്സിൽ പങ്കുവെച്ചത്.

സിനിമയുടെ ഉള്ളടക്കമാണ് ഖത്തറും കുവൈറ്റും വിലക്ക് ഏർപ്പെടുത്താൻ കാരണമെന്നാണ് വിവരം. സ്വവർഗാനുരാഗിയായ കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. ഇത് തന്നെയാണ് ചിത്രം വിലക്കാൻ കാരണം.

നേരത്തെ മോഹൻലാലും ഹണിറോസ് മുഖ്യവേഷത്തിലെത്തിയ മോൺസ്റ്റർ എന്ന സിനിമയും ഖത്തറും കുവൈറ്റും വിലക്കിയിരുന്നു. ഈ ചിത്രത്തിന്‍റെ ഉള്ളടക്കവും സ്വവർഗാനുരാഗികളുടെ കഥയായിരുന്നു.

ഏറെ പ്രതീക്ഷയോടെയാണ് കാതൽ ദ കോർ റിലീസിന് എത്തുന്നത്. ചിത്രത്തിൽ ലാലു അലക്സ്, മുത്തുമണി, ചിന്നുചാന്ദിനി, സുധി കോഴിക്കോട്, അനഘ അക്കു, ജോസി സജോ, ആദര്‍ശ് സുകുമാരൻ തുടങ്ങിയവരും അഭിനയിച്ചിട്ടുണ്ട്.

സാലു കെ തോമസാണ് ഛായാഗ്രഹണം. മമ്മൂട്ടി കമ്പനിയുടെ ബാനറില്‍ മമ്മൂട്ടി ആണ് കാതൽ ദ കോർ നിർമിച്ചിരിക്കുന്നത്. ആദര്‍ശ് സുകുമാരനും പോള്‍സൻ സ്‌കറിയയും ചേര്‍ന്നാണ് രചന നിർവഹിച്ചിട്ടുള്ളത്. വേഫെറെര്‍ ഫിലിംസ് ആണ് വിതരണം.