മുകേഷിനെതിരെ ഗാർഹിക പീഡനം ആരോപിച്ചിട്ടില്ലെന്ന് മേതിൽ ദേവിക; 'ചെളിവാരിയെറിയുന്നില്ല, വേർപിരിയൽ വേദനാജനകം'

പാലക്കാട്: സിനിമാതാരവും കൊല്ലം എം എൽ എ യുമായ മുകേഷുമായുള്ള വിവാഹമോചന വാർത്ത സ്ഥിരീകരിച്ച മേതിൽ ദേവിക മുകേഷിനെതിരെ ചെളിവാരി എറിയാൻ താല്പര്യമില്ലെന്ന് വ്യക്തമാക്കി. വിവാഹമോചന കാര്യം മുകേഷുമായി നേരത്തേ സംസാരിച്ചതാണ്. എന്നാൽ ഇക്കാര്യം ഗൗരവത്തിൽ തന്നെയാണ് പറഞ്ഞതെന്ന് വ്യക്തമാക്കാനാണ് വക്കീൽ നോട്ടീസയച്ചതെന്നും ഇവർ പറഞ്ഞു.

മുകേഷിനെതിരെ നൽകിയ നോട്ടീസിൽ ഗാർഹിക പീഡനം ആരോപിച്ചിട്ടുണ്ടെന്ന പ്രചാരണങ്ങൾ അടിസ്ഥാനരഹിതമാണ്.  ഈ വേർപിരിയിൽ വേദനാജനകമാണ്. എന്നാൽ മുകേഷിനെ ചെളിവാരിയെറിയാനില്ലെന്നും മേതിൽ ദേവിക വ്യക്തമാക്കി.

പരസ്പരം ദേഷ്യപ്പെട്ട് പിരിയേണ്ട സാഹചര്യമില്ലെന്നും മേതിൽ ദേവിക പറഞ്ഞു. വിവാഹമോചനം സംബന്ധിച്ച് മുകേഷുമായി നേരത്തേ സംസാരിച്ചതാണ്. ഇലക്ഷൻ കഴിയാൻ കാത്തുനിന്നതാണ്.- മേതിൽ ദേവിക പറഞ്ഞു.

വേർപിരിയിൽ വേദനാജനകമാണെന്നും ഒപ്പമുണ്ടാവണമെന്നും മേതിൽ ദേവിക പറഞ്ഞു.  മുകേഷുമായുള്ള വിവാഹമോചന വാർത്തകൾ സംബന്ധിച്ച് ആദ്യമായാണ് മേതിൽ ദേവിക പ്രതികരിയ്ക്കുന്നത്.

തികച്ചും വ്യക്തിപരമായ കാരണങ്ങളാണ് വേർപിരിയലിന് പിന്നിലെന്ന് ദേവിക വ്യക്തമാക്കി. വളരെ വേദനാജനകമായ സാഹചര്യത്തിലൂടെയാണ് കടന്നപ്പോവുന്നത്. മുകേഷുമായി ഇക്കാര്യം സംസാരിച്ചിട്ടുണ്ടെങ്കിലും അദ്ദേഹം വളരെ തിരക്കുള്ള ആളല്ലേയെന്നും നിലപാട് വ്യക്തമാക്കിയിട്ടില്ലെന്നും മേതിൽ ദേവിക പറഞ്ഞു.

തിരുവനന്തപുരത്തെ ഒരു അഭിഭാഷകന്‍ മുഖാന്തിരമാണ് മേതില്‍ ദേവിക മുകേഷിന് നോട്ടീസ് അയച്ചത്.  2013 ഒക്ടോബര്‍ 24 നായിരുന്നു മുകേഷും മേതില്‍ ദേവികയും തമ്മില്‍ വിവാഹിതരായത്.

നടി സരിതയാണ് മുകേഷിന്റെ ആദ്യ ഭാര്യ. മേതില്‍ ദേവികയുടെയും രണ്ടാം വിവാഹമായിരുന്നു ഇത്. സരിതയും മുകേഷും 1987ലാണ് വിവാഹിതരായത്. ഇരുപത്തിയഞ്ച് വർഷത്തെ ദാമ്പത്യത്തിന് ഒടുവിൽ സരിതയും 2011ല്‍ മുകേഷും വേർപിരിയുകയായിരുന്നു.