വിവാദങ്ങൾക്കിടെ 'വാക്ക് ഔട്ട്': രമേശ് ചെന്നിത്തലയുടെ നിയമസഭാ വാക്ക് ഔട്ട് പ്രസംഗങ്ങൾ പുസ്തകമായി

തിരുവനന്തപുരം: രാഷ്ട്രീയ വിവാദങ്ങൾക്കിടെ പ്രതിപക്ഷ നേതാവ് രമേശ് ചെന്നിത്തലയുടെ നിയമസഭാ വാക്ക് ഔട്ട് പ്രസംഗങ്ങൾ പുസ്തരൂപത്തിലിറങ്ങി. പ്രതിപക്ഷ നേതാവായതിനു ശേഷമുള്ള ആദ്യ പത്ത് സഭാ സമ്മേളനങ്ങളിലെ പ്രസംഗങ്ങളാണ് പുസ്തകത്തിൽ ഉൾപ്പെടുത്തിയിരിക്കുന്നത്.

ഡോ. എം.കെ മുനീർ ചെയർമാനായ ഒലിവ് പബ്ലിക്കേഷൻസാണ് പ്രസാധകർ. പ്രതിപക്ഷ നേതാവിന്റെ ഔദ്യോഗിക വസതിയായ കന്റോൺമെന്റ് ഹൗസിൽ നടന്ന ചടങ്ങിൽ മുൻ മുഖ്യമന്ത്രി ഉമ്മൻ ചാണ്ടി സിപിഐ നേതാവ് സി ദിവാകരൻ എം.എൽ.എയ്ക്ക് ആദ്യ കോപ്പി നൽകിയാണ് പുസ്തകം പ്രകാശനം ചെയ്തത്.

രമേശ് ചെന്നിത്തലയുടെ വാക്ക് ഔട്ട് പ്രസംഗങ്ങൾ ഏവരെയും ഇരുത്തി ചിന്തിപ്പിക്കുന്നവയാണെന്ന് ഉമ്മൻചാണ്ടി പറഞ്ഞു. വാക്ക് ഔട്ട് പ്രസംഗങ്ങൾ വളരെ പ്രാധാന്യം അർഹിക്കുന്നവയാണ് . ഇവയ്ക്ക് മറുപടി വരില്ലെങ്കിലും ജനങ്ങളുടെ മനസിൽ അത് നിൽക്കും. നിലവിലെ രാഷ്ട്രീയ സാഹചര്യത്തിൽ ദേശീയ തലത്തിൽ സമാന ചിന്താഗതിക്കാരായ പാർട്ടികൾ ഒന്നിക്കണമെന്നും ഉമ്മൻചാണ്ടി പറഞ്ഞു.

സംസ്ഥാനത്ത് പ്രതിപക്ഷം മികച്ച രീതിയിലാണ് പ്രവർത്തിക്കുന്നതെന്ന് പുസ്തകം ഏറ്റ് വാങ്ങിക്കൊണ്ട് സി ദിവാകരൻ പറഞ്ഞു. നിയമസഭ അംഗങ്ങളെല്ലാം രമേശ് ചെന്നിത്തലയുടെ പ്രസംഗങ്ങൾ ശ്രദ്ധിക്കും. അത് അദ്ദേഹത്തിന് കൊടുക്കുന്ന അംഗീകാരം കൂടിയാണെന്നും അദ്ദേഹം പറഞ്ഞു.

പ്രതിപക്ഷമെന്നു നോക്കാതെ സ്പീക്കർ പി ശ്രീരാമകൃഷ്ണൻ തനിക്ക് പ്രസംഗിക്കാൻ കൂടുതൽ സമയം അനുവദിച്ചിരുന്നെന്ന് രമേശ് ചെന്നിത്തല പറഞ്ഞു. .

വാക്ക് ഔട്ട് പ്രസംഗങ്ങൾക്കും സ്പീക്കർ സമയം അനുവദിച്ചതിനാലാണ് പുസ്തകം ഇറക്കാനായത്. ലോക്സഭയിലെ പ്രസംഗങ്ങളും പുസ്തക രൂപത്തിലാക്കുമെന്നും അദ്ദേഹം പറഞ്ഞു. കെപിസിസി അധ്യക്ഷൻ മുല്ലപ്പള്ളി രാമചന്ദ്രനും ചടങ്ങിൽ സംബന്ധിച്ചു. പ്രസാധകരൻ കൂടിയായ എം.കെ മുനീർ കോഴിക്കോട് നിന്നും ഓൺലൈനായാണ് ചടങ്ങിൽ പങ്കെടുത്തത്