ഒരു 'ത്രപ്പിൾ' പ്രണയകഥ; ഒരേ യുവതിയെ പ്രണയിച്ച് അവർക്കൊപ്പം ജീവിതം നയിക്കുന്ന ആത്മാർഥ സുഹൃത്തുക്കൾ

ത്രികോണ പ്രണയം പല സിനിമകളിലും പ്രമേയം ആയി വന്നിട്ടുണ്ട്. മലയാളത്തിൽ 'ഹരികൃഷ്ണൻസ്' എന്ന ചിത്രത്തിലും അത്തരമൊരു പ്രണയം തന്നെയായിരുന്നു. നായികയെ പ്രേമിക്കുന്ന രണ്ട് നായകന്മാർ. എന്നാൽ അവസാനം അതിലൊരാളെ നായിക തെരഞ്ഞെടുക്കുന്നിടത്താണ് ചിത്രം അവസാനിക്കുന്നത്. സിനിമകളിൽ കണ്ടിട്ടുള്ള മിക്ക ത്രികോണ പ്രണയങ്ങളിലും അവസാനം രണ്ട് പേർ സന്തോഷമായി ജീവിക്കുകയും ഒരാളുടെ ഹൃദയം തകരുകയുമാണ് പതിവ്.

എന്നാൽ ഇതിൽ നിന്നും വ്യത്യസ്തമായ ഒരു കഥയാണ് ബ്രസീല്‍ സ്വദേശികളായ ഡിനോ ഡിസൂസയ്ക്കും ആത്മാർഥ സുഹൃത്ത് സൗളോ ഗോമസിനും പറയാനുള്ളത്. സിനിമയെ വെല്ലുന്ന തരത്തിലാണ് ഇവരുടെ ജീവിത കഥ

ചാമ്പ്യൻസ് ലീഗ് കാണാൻ ബാഴ്സിലോണയിലെത്തിയതോടെയാണ്  നാൽപ്പതുകാരനായ ഡിനോയുടെയും 30കാരനായ സൗളോയുടെയും ജീവിതം മാറി മറിഞ്ഞത്. 2019 ആഗസ്റ്റിലാണ് ബാഴ്സിലോണയിലെ ഒരു ബാറിൽ വച്ച് ഇവർ ഓൾഗ എന്ന 27കാരിയെ ആദ്യമായി കാണുന്നത്.

സുഹൃത്തുക്കൾക്കുമൊപ്പം ബാറിലിരിക്കുകയായിരുന്ന ഓൾഗയോട് ആദ്യകാഴ്ചയിൽ തന്നെ ഇരുവർക്കും പ്രണയം തോന്നി. ഇക്കാര്യം പരസ്പരം പറയുകയും ചെയ്തു.

എന്നാൽ പ്രണയത്തിന്‍റെ പേരിൽ സൗഹൃദത്തിൽ വിള്ളൽ വീഴരുതെന്ന് ഇരുവരും ആദ്യമേ ഉറപ്പിച്ചു. അതുകൊണ്ട് തന്നെ രണ്ടു പേരും തങ്ങളുടെ ഇഷ്ടം യുവതിയോട് തുറന്നു പറഞ്ഞു

അന്നു മുതൽ ഇവർ മൂന്ന് പേരും ഒരുമിച്ചാണ്. 'കപ്പിൾ' എന്നതിന് പകരം 'ത്രപ്പിൾ' (throuple) പ്രണയബന്ധം. ഇങ്ങനെയൊരു ബന്ധമുണ്ടാകുമെന്ന് ആദ്യം കരുതിയിരുന്നില്ല എന്നാൽ പരസ്പരം ഒന്നിച്ചു സമയം ചിലവഴിച്ചതോടെ മൂന്ന് പേരും പ്രണയത്തിലാവുകയായിരുന്നു എന്നാണ് ഇവർ പറയുന്നത്.

ബന്ധുക്കൾക്കും സുഹൃത്തുക്കൾക്കുമൊക്കെ ആദ്യം ഞെട്ടലായിരുന്നു മൂവരും തമ്മിലുള്ള ബന്ധം.  കാര്യങ്ങൾ മനസിലാക്കാനും ഉൾക്കൊള്ളാനും ആരും തയ്യാറായതും ഇല്ല. എന്നാൽ പതിയെ  എല്ലാവരും തങ്ങളെ അംഗീകരിച്ചു തുടങ്ങിയെന്നാണ് ഇവർ പറയുന്നത്.

'ഞങ്ങളെ സംബന്ധിച്ചിടത്തോളം മൂന്ന് ആളുകൾ തമ്മിലുള്ള ബന്ധം എന്നത് ഒരു ചോദ്യമല്ല. ഞങ്ങൾ തമ്മിലുള്ള കെമിസ്ട്രി വളരെ ശക്തമാണ്. മറ്റേയാൾ ചിന്തിക്കുന്നതോ അല്ലെങ്കിൽ അനുഭവിക്കുന്നതോ പരസ്പരം മനസിലാക്കാൻ സാധിക്കുന്നു എന്നതാണ് വലിയ കാര്യം.. ഈ വികാരം എന്താണെന്ന് വാക്കുകളിൽ വിവരിക്കാനാകില്ല' ഡിനോ പറയുന്നു.

കഴിഞ്ഞ ഒന്നരവർഷമായി മൂവരും പ്രണയത്തിലായിട്ട്. എങ്കിലും ഇപ്പോഴും പലയിടത്തു നിന്നും മോശം പ്രതികരണങ്ങൾ നേരിടേണ്ടി വരുന്നുണ്ടെന്നും ഇവർ പറയുന്നു. പക്ഷെ ഇത്തരം കാര്യങ്ങൾ അവഗണിച്ച് ബന്ധം നല്ലരീതിയിൽ മുന്നോട്ട് കൊണ്ടു പോകാനാണ് ശ്രമിക്കുന്നത്

ജീവിതം പോസിറ്റീവ് ആയി കാണാനാണ് ശ്രമിക്കുന്നത്. നെഗറ്റീവ് കാര്യങ്ങൾക്ക് ശ്രദ്ധ കൊടുത്ത് സമയവും ഊർജവും കളയാന്‍ താത്പ്പര്യമില്ല' ഡിനോ വ്യക്തമാക്കി. എല്ലാ ബന്ധങ്ങളിലെയും പോയും ഈ മൂവർക്കുമിടയിലും പ്രശ്നങ്ങൾ ഉണ്ടാകാറുണ്ട്. എന്നാൽ അപ്പോൾ ഭൂരിപക്ഷം നോക്കി അന്തിമ തീരുമാനം എടുക്കാറാണ് പതിവ്. ആര്‍ക്കെങ്കിലും ഒരാൾക്ക് എന്തെങ്കിലും പ്രശ്നം വന്നാൽ അത് മൂന്നു പേരുടെയും പ്രശ്നമായി കണ്ട് പരിഹാരത്തിന് ശ്രമിക്കും.

കൂട്ടത്തിൽ സൗളോ ഗൗരവക്കാരനും ചിട്ടയുള്ളയാളാണെന്നും ഡിനോ പറയുന്നു. ഓൾഗ ആകട്ടെ തീർത്തും എതിർ സ്വഭാവക്കാരിയും. പക്ഷെ ഉപാധികളില്ലാത്ത കളങ്കമില്ലാത്ത സ്നേഹം ഈ ബന്ധത്തെ തകരാതെ മുന്നോട്ട് കൊണ്ടു പോവുകയാണ്.

നിലവിൽ ഫ്രാൻസിൽ താമസിക്കുന്ന ഈ 'ത്രപ്പിള്‍സിന്' ഭാവിയിൽ കുട്ടികൾ വേണമെന്നും ആഗ്രഹമുണ്ട്. 'എന്‍റെയും സൗളോയുടെയും കുഞ്ഞുങ്ങൾക്ക് ഓൾഗ ജന്മം നൽകണമെന്നാണ് ആഗ്രഹം' ഡിനോ വ്യക്തമാക്കി.