1984ലെ എഞ്ചിനീയറിങ് ബാച്ചിന് ഒരുമിച്ച് ലോകം ചുറ്റാൻ സ്വന്തമായി വെബ്‌സൈറ്റും വാട്‌സാപ്പ് ഗ്രൂപ്പും

നസ്രീന്‍ ഫസല്‍ എന്ന യുവതിയാണ് തന്റെ പിതാവിന്റെയും സുഹൃത്തുക്കളുടെയും യൂറോപ്യന്‍ പര്യടനത്തിന്റെ വീഡിയോ സമൂഹമാധ്യമത്തില്‍ പങ്കുവെച്ചിരിക്കുന്നത്. 1984-ല്‍ എഞ്ചിനീയറിങ് പൂര്‍ത്തിയാക്കിയ ബാച്ചിലെ സുഹൃത്തുക്കളുടെ ലോകപര്യടനമായിരുന്നു അത്. എഞ്ചിനീയറിങ് ബിരുദം നേടി കോളേജ് വിട്ടിട്ട് നാല് പതിറ്റാണ്ടുകളായെങ്കിലും നസ്രിന്റെ പിതാവിന്റെയും സുഹൃത്തുക്കള്‍ക്കുമിടയിലെ സൗഹൃദത്തിന് തരിമ്പും കുറവ് വന്നിട്ടില്ല. ഈ ബാച്ചിലെ ഭൂരിഭാഗം ആളുകളും നസ്രീന്റെ വിവാഹത്തില്‍ പങ്കെടുക്കുകയും ചെയ്തിരുന്നുവെന്ന് നസ്രീന്‍ വീഡിയോയില്‍ പറയുന്നു. ഈ സംഘത്തിന് ഒരു വെബ്‌സൈറ്റും അംഗങ്ങള്‍ തമ്മില്‍ പരസ്പരം വിവരങ്ങള്‍ കൈമാറുന്നതിനും യാത്രകള്‍ പ്ലാന്‍ ചെയ്യുന്നതിനുമായി വാട്‌സാപ്പ് ഗ്രൂപ്പുമുണ്ട്. ഈ പ്ലാനിംഗ് കമ്മിറ്റിയിൽ ചെയര്‍മാന്‍, സാമ്പത്തിക വിദഗ്ധര്‍, ആവശ്യമായ സേവനങ്ങളും മറ്റുകാര്യങ്ങളും ഒരുക്കുന്നവർ, എന്തിന് വിനോദകാര്യങ്ങള്‍ കൈകാര്യം ചെയ്യുന്നതിനുള്ള സംഘങ്ങൾ വരെ ഈ ബാച്ചിലുണ്ട്.

എന്റെ പിതാവിന്റെയും സുഹൃത്തുക്കളുടെയും പോലുള്ള ഒരു സുഹൃത് സംഘത്തെ ഞാനിതുവരെ കണ്ടിട്ടില്ല. 40 വര്‍ഷത്തോളം എങ്ങനെയാണ് ആളുകള്‍ക്ക് ഇത്രത്തോളം അടുപ്പം സൂക്ഷിക്കാന്‍ കഴിയുകയും യാത്രകള്‍ പ്ലാന്‍ ചെയ്യാന്‍ പറ്റുകയും ചെയ്യുന്നത്. ഇത്തരമൊരു സൗഹൃദം ജീവിതകാലത്ത് ഒരൊറ്റത്തവണയേ ലഭിക്കുകയുള്ളൂ. ഇക്കാലമത്രയും ഞാന്‍ ആഗ്രഹിച്ച സ്ഥലങ്ങള്‍ കണ്ടുതീര്‍ക്കാന്‍ എനിക്ക് കഴിഞ്ഞിട്ടില്ല. എന്നാല്‍, ഈ സംഘത്തിന്റെ ഭാഗമാകാന്‍ കഴിഞ്ഞത് വളരെ വലിയ കാര്യമാണ്. രാത്രി വളരെ വൈകിയും നഗരത്തില്‍ ചുറ്റിക്കറങ്ങുകയും പിറ്റേദിവസം നേരത്തെ ഉണര്‍ന്ന് ഒന്നിച്ച് നടക്കാന്‍ ഇറങ്ങുകയും ചെയ്യുന്ന അവരുടെ ഊര്‍ജസ്വലത ഒന്നുവേറെ തന്നെയാണ്-നസ്രീന്‍ ഇന്‍സ്റ്റഗ്രാമില്‍ കുറിച്ചു.

ജൂലൈ 31-ന് സാമൂഹികമാധ്യമത്തില്‍ പങ്കുവെച്ച ഈ വീഡിയോ വളരെ വേഗമാണ് വൈറലായത്. ഇതുവരെയും 25 ലക്ഷത്തില്‍ അധികം പേരാണ് ഈ വീഡിയോ കണ്ടുകഴിഞ്ഞത്. ഈ സൗഹൃദത്തെ പുകഴ്ത്തിയും അഭിനന്ദിച്ചും നിരവധിപേര്‍ വീഡിയോയ്ക്ക് കമന്റ് ചെയ്തിട്ടുണ്ട്.

1972-ലെ സൈനികരുടെ ഒരു ബാച്ച് സമാനമായ രീതിയില്‍ ഒത്തുചേരുന്നുണ്ടെന്ന് വീഡിയോയുടെ താഴെ ഒരാള്‍ കമന്റ് ചെയ്തു. 1972-ല്‍ കമ്മിഷന്‍ ചെയ്ത ഈ ബാച്ച് 50-ാം വാര്‍ഷികം ആഘോഷിക്കുന്നതിന് ബാലിയിലേക്ക് ട്രിപ് പ്ലാന്‍ ചെയ്തിട്ടുണ്ടെന്നും അവര്‍ പറഞ്ഞു.