Viral Video | പിടിയാനയ്ക്ക് പൂക്കൾ നൽകി പ്രണയാഭ്യര്‍ത്ഥന നടത്തുന്ന കൊമ്പന്‍; പ്രണയനിമിഷങ്ങള്‍ സോഷ്യൽ മീഡിയയിൽ വൈറൽ

ഇന്‍സ്റ്റഗ്രാമില്‍ വൈറലായ വീഡിയോയില്‍ കാണുന്നത് - ഒരു കൊമ്പനാന തന്റെ തുമ്പിക്കൈയില്‍ ഒരു കുല പൂവുമായി മുന്നോട്ട് നടക്കുന്നതാണ്. മനുഷ്യരുടെ വിവാഹ വേദി പോലെ പൂക്കളാലും മറ്റും അലങ്കരിച്ച ഒരു മരച്ചുവട്ടില്‍ ഒരു പിടിയാന നില്‍ക്കുന്നുണ്ട്. തുമ്പിക്കൈയില്‍ പിടിച്ചിരിക്കുന്ന ഒരു കെട്ട് പിങ്ക് പൂക്കുലകള്‍ കൊമ്പനാന, ആ പിടിയാനയ്ക്ക് നേരെ നീട്ടുന്നു. കൗതുകകരമെന്നു പറയട്ടെ, ആ പിടിയാന ആ പൂക്കള്‍ വളരെ സ്‌നേഹത്തോടെ സ്വീകരിക്കുന്നു. ഇടയ്ക്ക് കൊമ്പനാന, മുന്‍ കാലുകള്‍ വളച്ച് മുട്ടുകുത്തുന്നപോലെയും കാണുന്നുണ്ട്. തന്റെ കാമുകിയോട് വിവാഹാഭ്യര്‍ത്ഥന നടത്താന്‍ കൈയില്‍ പൂക്കളുമായി മുട്ടുകുത്തി നില്‍ക്കുന്ന കാമുകനെ അനുസ്മരിപ്പിക്കുന്ന ഒരു രംഗമാണ് ഇത് കാണുമ്പോള്‍ മനസ്സിൽ തോന്നുക.

Also Read- Arvind Kejriwal | 'ഭക്ഷണം കഴിക്കാന്‍ വീട്ടിലേയ്ക്ക് വരാമോ?' അരവിന്ദ് കേജ്രിവാളിനോട് ഓട്ടോക്കാരന്റെ ചോദ്യം

പൂക്കള്‍ കൈമാറിയതിന് ശേഷം കൊമ്പനാന തുമ്പിക്കൈ ഉയര്‍ത്തി ആഹ്ളാദം പ്രകടിപ്പിക്കുന്നുണ്ട്. തുടര്‍ന്ന് കൊമ്പനാനയും പിടിയാനയും തുമ്പിക്കൈകള്‍ ഒരുമിച്ച് ഉയര്‍ത്തി ചേര്‍ത്തുപിടിക്കുമ്പോള്‍ ദൃശ്യങ്ങള്‍ അവസാനിക്കുന്നു. ശരിക്കും ഈ കൊമ്പനാന ഒരു മനുഷ്യനെപ്പോലെ അല്ലെങ്കില്‍ ഒരുപക്ഷേ അതിലും കൂടുതല്‍ റൊമാന്റിക് ആണെന്നാണ് തോന്നുന്നത്. കൊമ്പന്‍ തന്റെ ഇണയായ പിടിയാനയുടെ അരികിലേക്ക് നടക്കുന്നത് മുതല്‍ അതിനോട് ഒത്തുചേര്‍ന്ന് നിൽക്കുന്നതുവരെയുള്ള ആ ദൃശ്യങ്ങള്‍ ഏതൊരു റോമാന്റിക് സിനിമയെയും വെല്ലുന്നതാണ്.

ഒരുപക്ഷേ മനുഷ്യരുടെ നിയന്ത്രണത്തലായിരിക്കാമെങ്കില്‍ പോലും ഈ ആനകളും പ്രണയനിമിഷങ്ങളും വളരെ മനോഹരമായിരിക്കുന്നു. 'എലിഫന്റ്‌സ് ഓഫ് വേള്‍ഡ്' എന്ന ഇന്‍സ്റ്റാഗ്രാം പേജിലാണ് ഈ വീഡിയോ പങ്കുവിച്ചിരിക്കുന്നത്. വീഡിയോടൊപ്പം 'പ്രെപ്പോസല്‍ അക്‌സ്പ്റ്റഡ്' എന്ന് കുറിക്കുകയും ചെയ്തിട്ടുണ്ട്. നവംബര്‍ ഏഴിന് പങ്കുവച്ച ഈ വീഡിയോയ്ക്ക് ഇതിനകം ഒന്നേകാല്‍ ലക്ഷത്തിലധികം ലൈക്കുകളും ഒട്ടേറെ കമന്റുകളും ലഭിച്ചിട്ടുണ്ട്. ഇന്‍സ്റ്റഗ്രാമില്‍ മാത്രല്ല യുട്യൂബ് ഉള്‍പ്പടെയുള്ള മറ്റ് സോഷ്യല്‍ മീഡിയ പ്ലാറ്റ്ഫോമുകളിലും ഈ വീഡിയോ ആളുകള്‍ പങ്കിടുകയും വൈറലാകുകയും ചെയ്തിട്ടുണ്ട്.

Also Read- Ghost In Bar | ബാറിൽ 'പ്രേതം'; ബിയർ ഗ്ലാസ് മറിച്ചിടുന്ന വീഡിയോ പങ്കുവെച്ച് യുവതി

ഇന്‍സ്റ്റഗ്രാം വീഡിയോയുടെ കമന്റ് സെക്ഷനില്‍, ഒരു ഉപയോക്താവ് എഴുതി: ''ഓ മൈ ഗുഡ്നെസ്, ഈ ആന ദമ്പതികളെ കാണാൻ വളരെ മനോഹരമായിരിക്കുന്നു'' എന്നാണ്. ''കൊള്ളാം! ഇത് തികച്ചും റൊമാന്റിക് ആണ്'' എന്നായിരുന്നു മറ്റൊരു ഉപയോക്താവ് കുറിച്ചത്. നിരവധി പേര്‍ ഈ വീഡിയോയ്ക്ക് അനുകൂലമായി പ്രതികരിച്ചപ്പോള്‍ ചിലര്‍, ആനകളെ ഇത് നിര്‍ബന്ധിതമായി ചെയ്യാന്‍ പ്രേരിപ്പിച്ചിട്ടില്ലെന്ന് പ്രതീക്ഷിക്കുന്നതായും അഭിപ്രായപ്പെട്ടു. ചിലര്‍ രൂക്ഷമായി പ്രതികരിച്ചിരുന്നു. ''ഇങ്ങനെ ചെയ്യാന്‍ അവരെ (ആനകളെ) എന്ത് മാത്രം ഉപദ്രവിച്ചിട്ടുണ്ടെന്ന് ചിന്തിക്കുമ്പോള്‍ ഇത് ഞാന്‍ വെറുക്കുന്നു, ഇത് തെറ്റാണ്'' എന്ന് മറ്റൊരാൾ പ്രതികരിച്ചു.