ശെടാ നായ്ക്കളെ പാണ്ടയാക്കാന്‍ മൃഗശാല ചെയ്ത പണി; ദേഹത്ത് കറുപ്പും വെളുപ്പും പെയിന്റടിക്കുക !

നമുക്ക് വളരെയധികം ആകര്‍ഷണം തോന്നുന്ന ജീവികളൊന്നാണ് പാണ്ട. മനുഷ്യരുമായി വേഗത്തില്‍ ഇണങ്ങുന്ന പാണ്ടകളുടെ വീഡിയോകള്‍ സമൂഹികമാധ്യമങ്ങളില്‍ തരംഗം തീര്‍ക്കാറുണ്ട്. എന്നാല്‍ ചൈനയിലെ ഒരു മൃഗശാലയില്‍നിന്നുള്ള വീഡിയോ ആണ് ഇപ്പോള്‍ സാമൂഹികമാധ്യമങ്ങളില്‍ ചര്‍ച്ചാ വിഷയം. ചൗ-ചൗ ഇനത്തില്‍പ്പെട്ട നായകളെ പാണ്ഡകളെപ്പോലെയാക്കാൻ അവയുടെ ദേഹത്ത് കറുപ്പും വെളുപ്പും ചായങ്ങള്‍ പൂശിയതിന് കടുത്ത വിമര്‍ശനം നേരിടുകയാണ് മൃഗശാല. ജിയാങ്‌സു പ്രവിശ്യയിലെ നായ്‌ഷോ മൃഗശാലയില്‍ നിന്നുള്ളതാണ് ഈ വീഡിയോ എന്നാണ് റിപ്പോര്‍ട്ടുകള്‍. വീഡിയോ പുറത്തുവന്നതോടെ സോഷ്യല്‍ മീഡിയയിൽ സമ്മിശ്ര പ്രതികരണങ്ങളാണ് ഉയരുന്നത്.