ഇതൊക്കെ മോശം വർഷം എന്നാണോ ? ചരിത്രത്തിലെ ഏറ്റവും മോശം വര്‍ഷം ഏതാണെന്ന് അറിയാമോ?

എ.ഡി 536ല്‍ യൂറോപ്പിലും മിഡില്‍ ഈസ്റ്റിലും ഏഷ്യയുടെ ചില ഭാഗങ്ങളിലും കനത്ത മൂടല്‍ മഞ്ഞ് പരന്നിരുന്നു. സൂര്യനെ പോലും ഈ മൂടല്‍ മഞ്ഞ് മറച്ചിരുന്നു. 18 മാസം നീണ്ടുനിന്ന ഈ മൂടല്‍ മഞ്ഞ് ഭൂമിയെ ഇരുട്ടിലാക്കിയെന്നും ഭൂമിയുടെ താപനില കുറയ്ക്കാന്‍ കാരണമായി എന്നും ചരിത്രകാരന്‍മാര്‍ പറഞ്ഞു. സ്വഭാവിക താപനില കുറഞ്ഞതോടെ കാര്‍ഷിക വിളകള്‍ നശിക്കുകയും രോഗങ്ങളും മറ്റും പടരുകയും ചെയ്തു. നിരവധി പേരാണ് ഇക്കാലത്ത് മരണത്തിന് കീഴടങ്ങിയത്.

സൂര്യപ്രകാശത്തെ വരെ തടഞ്ഞ ഈ മൂടല്‍ മഞ്ഞിന് കാരണം ഒരു അഗ്നിപര്‍വ്വത സ്‌ഫോടനമാണെന്ന് വിദഗ്ധര്‍ പറയുന്നു. 2018ല്‍ ആന്റിക്വിറ്റി എന്ന ജേണലില്‍ പ്രസിദ്ധീകരിച്ച ലേഖനത്തിലാണ് ഇതേപ്പറ്റി പറയുന്നത്. എഡി 536ല്‍ സംഭവിച്ച ഐസ് ലാന്‍ഡിക് അഗ്നിപര്‍വ്വത സ്‌ഫോടനത്തിന്റെ ചാരമായിരുന്നു സൂര്യപ്രകാശത്തെ തന്നെ മറച്ച മൂടല്‍ മഞ്ഞിന് കാരണമായത്. 1815ല്‍ തംബോറ അഗ്നിപര്‍വ്വതം പൊട്ടിത്തെറിച്ചതും വലിയ നാശനഷ്ടങ്ങള്‍ ഉണ്ടാക്കിയിരുന്നു.