Lost Cat | നഷ്ടപ്പെട്ട പൂച്ചയെ 17 വർഷങ്ങൾക്ക് ശേഷം ഉടമയ്ക്ക് തിരികെ ലഭിച്ചു; രക്ഷയായത് മൈക്രോചിപ്പ് 

നഷ്‌ടപ്പെട്ടുവെന്ന് കരുതിയ വളർത്തുമൃഗങ്ങളെ തിരികെ കിട്ടുന്നത് വലിയ സന്തോഷം തന്നെയാണ്. 17 വർഷത്തിന് ശേഷം തന്റെ പൂച്ചയെ (Cat) തിരികെ കിട്ടിയ യുകെ (UK) സ്വദേശിനി കിം കോളിയേഴ്‌സ് ഇങ്ങനെയൊരു സന്തോഷത്തിലാണ്. കിം ഇംഗ്ലണ്ടിൽ നിന്ന് സ്‌കോട്ട്‌ലൻഡിലെ മിഡ്‌ലോത്തിയനിലേക്ക് താമസം മാറിയിരുന്നു. വീടു മാറിയതിന് തൊട്ടുപിന്നാലെയാണ് കിമ്മിന് ടില്ലി എന്ന തന്റെ പൂച്ചയെ നഷ്ടപ്പെട്ടത്. പൂച്ചയുടെ ഫോട്ടോ പതിച്ച പോസ്റ്ററുകളും മറ്റും പതിച്ച് കിം നിരവധി തവണ പൂച്ചയെ തിരികെ കിട്ടാനായി അന്വേഷണം നടത്തിയിരുന്നു. കൂടാതെ പൂച്ചയുടെ മൈക്രോചിപ്പ് വിശദാംശങ്ങൾ കിം യഥാസമയം അപ്‌ഡേറ്റ് ചെയ്തുകൊണ്ടിരുന്നു. ഇതിനിടെ രണ്ട് വീടുകൾ മാറിയെങ്കിലും മൈക്രോചിപ്പിലെ വിവരങ്ങൾ അപ്ഡേറ്റ് ചെയ്യാൻ കിം മറന്നിരുന്നില്ല.