വിവാഹവേദിയിൽ അതിഥിയായി ജയ്പൂരിൽ വധുവിന്റെ സ്വർണ്ണവും പണവും കവർന്ന കള്ളൻ ക്യാമറയിൽ കുടുങ്ങി

നവീൻ കരോൾ എന്ന യുവാവിന്റെ വിവാഹച്ചടങ്ങുകൾ പുരോഗമിക്കവെയാണ് മോഷണം നടന്നത്. വധൂവരന്മാർ സ്റ്റേജിൽ അതിഥികളെ സ്വീകരിക്കുന്നതിനും ഫോട്ടോ എടുക്കുന്നതിനും ഇടയിൽ മോഷ്ടാവ് വേദിയിലേക്ക് കയറിപ്പറ്റി. ആർക്കും സംശയം തോന്നാത്ത രീതിയിൽ വസ്ത്രം ധരിച്ചെത്തിയ ഇയാൾ, വധു ഇരുന്ന കസേരയ്ക്ക് താഴെ വെച്ചിരുന്ന ബാഗ് അതിവിദഗ്ധമായി കൈക്കലാക്കി. തന്റെ ബ്ലേസറിനുള്ളിൽ ബാഗ് ഒളിപ്പിച്ച് ഇയാൾ ഉടൻ തന്നെ വേദിയിൽ നിന്നും കടന്നുകളയുകയായിരുന്നു.

ഫോട്ടോഷൂട്ട് കഴിഞ്ഞ് ബാഗ് തിരഞ്ഞപ്പോഴാണ് മോഷണ വിവരം പുറത്തറിയുന്നത്. ബന്ധുക്കളും സുഹൃത്തുക്കളും വിവാഹത്തിരക്കിലായിരുന്നതിനാൽ ആരും ഇത് ശ്രദ്ധിച്ചിരുന്നില്ല. തുടർന്ന് സംശയം തോന്നിയ കുടുംബാംഗങ്ങൾ ഫോട്ടോഗ്രാഫർ പകർത്തിയ വീഡിയോ ദൃശ്യങ്ങൾ പരിശോധിച്ചു. അതിഥികൾക്കൊപ്പം സ്റ്റേജിൽ കയറുന്നതും ബാഗുമായി കടന്നുകളയുന്നതും ദൃശ്യങ്ങളിൽ വ്യക്തമായി പതിഞ്ഞിട്ടുണ്ട്.

വരന്റെയും വധുവിന്റെയും കുടുംബങ്ങൾ നൽകിയ പരാതിയുടെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. വീഡിയോ ദൃശ്യങ്ങൾ കേന്ദ്രീകരിച്ച് പ്രതിയെ കണ്ടെത്താനുള്ള ശ്രമത്തിലാണ് ജയ്പൂർ പോലീസ്.