അമ്മ ഉപേക്ഷിച്ച 'പഞ്ചിന്' താങ്ങായത് പാവക്കുട്ടി; ലോകത്തിന്റെ മനം കവർന്ന് ജപ്പാൻ മൃഗശാലയിലെ കുട്ടിക്കുരങ്ങൻ

2025 ജൂലൈയിൽ ജനിച്ച പഞ്ചിനെ പ്രസവിച്ച ഉടൻ തന്നെ അമ്മ ഉപേക്ഷിക്കുകയായിരുന്നു. കുഞ്ഞിന്റെ ജീവൻ നിലനിർത്താൻ മൃഗശാല അധികൃതർ അവനെ ഏറ്റെടുത്ത് വളർത്തി. ഒറ്റപ്പെട്ടുപോയ പഞ്ചിന് ആശ്വാസമേകാൻ അധികൃതർ അവന്റെ കൂട്ടിലേക്ക് ഒരു പാവക്കുട്ടിയെ (Orangutan plush toy) ഇട്ടു നൽകി. താമസിയാതെ പഞ്ച് ആ പാവയെ തന്റെ അമ്മയെപ്പോലെ സ്നേഹിച്ചു തുടങ്ങി. എപ്പോഴും ആ പാവയെ കെട്ടിപ്പിടിക്കുന്നതും ഒപ്പം കൊണ്ട് നടക്കുന്നതും ഉറങ്ങുന്നതുമെല്ലാം കണ്ടതോടെ സോഷ്യൽ മീഡിയയിൽ #HangInTherePunch എന്ന ഹാഷ്‌ടാഗ് വൈറലായി.

കുറച്ചു കാലം പാവക്കുട്ടിക്കൊപ്പം കഴിഞ്ഞ പഞ്ച് ഇപ്പോൾ തന്റെ കുരങ്ങൻ കൂട്ടത്തിലേക്ക് പതുക്കെ ലയിച്ചു തുടങ്ങിയിരിക്കുകയാണ്. മറ്റ് കുരങ്ങന്മാർ പഞ്ചിനെ തലോടുന്നതും അവനോടൊപ്പം കളിക്കുന്നതും മൃഗശാല അധികൃതർ നിരീക്ഷിച്ചിട്ടുണ്ട്. മറ്റ് കൂട്ടുകാരെ കിട്ടിയെങ്കിലും തന്റെ പ്രിയപ്പെട്ട പാവക്കുട്ടിയെ വിട്ടുപിരിയാൻ പഞ്ച് ഇപ്പോഴും തയ്യാറല്ല.