നഷ്ടമായ ഉടമയെ കണ്ടെത്താൻ 250 കിലോമീറ്റർ ഒറ്റക്ക് സഞ്ചരിച്ച് വളർത്തുനായ

Published by:Vishnupriya S
news18-malayalam

Last Updated:Jul 31, 2024 4:06 PM IST

250 കിലോമീറ്റർ ഒക്കെ ഒരു വളർത്തുനായക്ക് ഒറ്റക്ക് സഞ്ചരിക്കാൻ സാധിക്കുമോ?

Impact Shortsഗേറ്റ് വേ ഏറ്റവും പുതിയ വാർത്തയ്ക്കായി

നഷ്ടമായ ഉടമയെ കണ്ടെത്താൻ 250 കിലോമീറ്റർ ഒറ്റക്ക് സഞ്ചരിച്ച് വളർത്തുനായ. കർണ്ണാടകയിൽ ബെലഗാവി ജില്ലയിലെ യമഗരനി ഗ്രാമത്തിലാണ് സംഭവം. മഹാരാഷ്ട്രയിലെ പന്ധർപൂരിലേക്കുള്ള ഒരു പദയാത്രയ്ക്കിടെയാണ് ഈ വളർത്തുനായയെ കാണാതാകുന്നത്. മഹാരാഷ്ട്രയിലെ പന്ധർപൂരിൽ നിന്നും കർണാടകയിലെ ബെലഗാവി ഗ്രാമത്തിലേക്ക് 250 കിലോമീറ്ററുകൾ തനിയെ താണ്ടിയാണ് ഈ വീരൻ മടങ്ങിയെത്തിയത്. മഹാരാജ് എന്നാണ് ഈ വളർത്തുനായയുടെ വിളിപ്പേര്.

യമഗരണി സ്വദേശിയായ ജ്ഞാനദേവ് കുമ്പാറും സുഹൃത്തുക്കളും ജൂൺ അവസാനമാണ് പദയാത്ര ആരംഭിച്ചത്. അദ്ഭുതമെന്നു പറയട്ടെ, ഈ വർഷം അദ്ദേഹത്തിൻ്റെ വളർത്തുനായയും കൂട്ടത്തിൽ ചേർന്നു. അവർ ഏകദേശം 10 ദിവസങ്ങൾ നിണ്ട യാത്രക്കൊടുവിൽ ആഷാഡ ഏകാദശിയുടെ തലേന്ന് പണ്ഡർപൂരിൽ എത്തി. എന്നാൽ അവിടെവച്ച് തന്റെ നായയെ കാണാതെയായി.

വിഠോബ ക്ഷേത്രത്തിലെ ദർശനത്തിന് ശേഷമാണ് നായയെ കാണാതായതെന്ന് ജ്ഞാനദേവ് കുമ്പാർ പറഞ്ഞു. അവനെ അന്വേഷിച്ച് ചെന്നപ്പോൾ നായ മറ്റൊരു കൂട്ടം ആളുകളുടെ കൂടെ പോയതായി തോന്നി. തുടര്‍ന്ന് കുമ്പാറും സുഹൃത്തുക്കളും നടത്തിയ തിരച്ചിൽ പരാജയപ്പെട്ടു. പിന്നീട് തിരച്ചിൽ അവസാനിപ്പിച്ച് വീട്ടിലേക്ക് പോകുകയായിരുന്നു.

എന്നാല്‍, ജൂലൈ 29 ന് നായ വീട്ടിലേക്ക് മടങ്ങി എത്തിയപ്പോൾ സന്തോഷത്തിനൊപ്പം അത്ഭുതമായി തോന്നി. തന്റെ നായയ്ക്ക് പൊതുസ്വീകരണം ഒരുക്കുയും മാല ചാർത്തി പാണ്ഡുരംഗ് ദേവാലയത്തിൽ നിന്ന് കുംബർ ഗല്ലിയിലേക്ക് ഘോഷയാത്രയായി കൊണ്ടുപോവുകയും ചെയ്തു. ആഘോഷത്തിൽ പങ്കുചേർന്നവർക്കെല്ലാം ഉച്ചഭക്ഷണവും ഒരുക്കി.