കല്യാണ മാലയിൽ നിന്ന് നോട്ടു മോഷ്ടിച്ച കള്ളനെ പിടികൂടാന്‍ മിനിട്രക്കില്‍ തൂങ്ങിക്കിടക്കുന്ന വരന്‍; വൈറല്‍ വീഡിയോ

വിവാഹച്ചടങ്ങിനിടെ വരനും വധുവിനും ബന്ധുക്കളും സുഹൃത്തുക്കളും നോട്ടുകള്‍ ചേര്‍ത്ത മാല അണിയിക്കുന്നത് സാധാരണ കാഴ്ചയാണ്. ഇങ്ങനെ സമ്മാനമായി ലഭിച്ച നോട്ടുകെട്ടുകള്‍ കൊണ്ടുള്ള കല്യാണമാല കള്ളന്‍ മോഷ്ടിച്ചുകൊണ്ടുപോയാല്‍ എന്തു ചെയ്യും? വിവാഹച്ചടങ്ങ് പുരോഗമിക്കുന്നതിനിടെ തന്റെ നോട്ടുകള്‍ കൊണ്ടുള്ള കല്യാണ മാല മോഷ്ടിച്ച് കടന്നുകളഞ്ഞ കള്ളനെ പിടികൂടിയ വരന്റെ വീഡിയോ ആണ് ഇപ്പോള്‍ സോഷ്യല്‍ മീഡിയയില്‍ ട്രെന്‍ഡിംഗ് ആയിരിക്കുന്നത്. ഒരു ആക്ഷന്‍ സിനിമയിലെ രംഗങ്ങളെ ഓര്‍മിക്കുന്ന വിധത്തിലാണ് വരന്‍ ദേവ് കുമാർ കള്ളനെ പിടികൂടുന്നത്. ഉത്തര്‍പ്രദേശിലെ മീററ്റിലാണ് സംഭവം. മാലയിലെ നോട്ടുകള്‍ തട്ടിയെടുത്ത് ഓടിയ കള്ളനെ പിടികൂടാനായി അതിവേഗതയിലാണ് വരന്‍ ഓടുന്നത്. വിവാഹത്തിനിടെയുള്ള ഒരു പരമ്പരാഗത ചടങ്ങിന് ശേഷം കുതിരപ്പുറത്ത് കയറുകയായിരുന്നു വരന്‍. അപ്പോഴാണ് മാല മോഷ്ടിക്കപ്പെട്ടത്. രണ്ടാമതൊന്ന് ആലോചിക്കുക പോലും ചെയ്യാതെ വരന്‍ കള്ളന്റെ പിന്നാലെ കുതിച്ചു.