'ആ വേദനയേക്കുറിച്ച് അദ്ദേഹം പറഞ്ഞിട്ടുണ്ട്'; കാൻസർ രോഗികളായ കുട്ടികൾക്ക് മുടി നൽകി യുവരാജ് സിങ്ങിന്റെ ഭാര്യ

കാൻസർ രോഗികളായ കുട്ടികൾക്ക് മുടി ദാനം നൽകി മുൻ ഇന്ത്യൻ ക്രിക്കറ്റ് താരം യുവരാജ് സിങ്ങിന്റെ ഭാര്യയും നടിയും മോഡലുമായ ഹേസൽ കീച്ച്. യുകെ ആസ്ഥാനമായി പ്രവർത്തിക്കുന്ന ലിറ്റിൽ പ്രിൻസസ് ട്രസ്റ്റിനാണ് മുടി ദാനം ചെയ്തത്. ഹേസൽ ഇക്കാര്യം സമൂഹ മാധ്യമത്തിലൂടെയാണ് പങ്കുവച്ചത്. ഇൻസ്റ്റഗ്രാമിൽ മുടി മുറിക്കുന്നതിനു മുൻപും ശേഷവമുള്ള ചിത്രത്തോടപ്പം ഒരു വലിയ കുറിപ്പും പങ്കുവച്ചിട്ടുണ്ട്. കുറിപ്പില്‍ ഈ തീരുമാനമെടുത്തതിന് പിന്നിൽ ഭർത്താവ് യുവരാജ് സിങ്ങിന്റെ പിന്തുണ വളരെ വലുതാണെന്നും മുടി നഷ്ടമാകുമ്പോഴുള്ള വേദനയെ കുറിച്ച് അദ്ദേഹം പറഞ്ഞിട്ടുണ്ടെന്നും ഹേസൽ പറയുന്നുണ്ട്. പ്രസവ ശേഷം മുടികൊഴിച്ചിൽ കൂടിയപ്പോൾ മുടിമുറിക്കാൻ തീരുമാനിക്കുകയായിരുന്നുവെന്ന് താരം കുറിച്ചു.