സിവിയും റെസ്യൂമെയും ഒന്നാണോ? ഇവ തമ്മിലുള്ള വ്യത്യാസങ്ങൾ എന്തെല്ലാം?

CV എന്ന ചുരുക്കെഴുത്ത് ലാറ്റിൻ ഭാഷയിൽ “ജീവിത ഗതി” എന്നർത്ഥം വരുന്ന “Curriculum Vitae” എന്ന പദത്തിൽ നിന്നാണ് ഉണ്ടായത്. ഒരാളുടെ പ്രൊഫഷണലായി ഉണ്ടായിട്ടുള്ള നേട്ടങ്ങൾ, വ്യക്തിഗതമായ വിവരങ്ങൾ എന്നിവയ്‌ക്കൊപ്പം ഒരു വ്യക്തിയുടെ അക്കാദമിക് കരിയറിന്റെ വിശദമായ രേഖയാണിത്. ഇത് ഒരാളുടെ ജീവിതത്തിന്റെ സംഗ്രഹിച്ച ജീവചരിത്രം പോലെയാണ് എന്ന് തന്നെ പറയാം. വിദ്യാഭ്യാസ ചരിത്രം, തൊഴിൽ ചരിത്രം, നൈപുണ്യങ്ങൾ, നേട്ടങ്ങൾ, അംഗീകാരങ്ങൾ, ഹോബികൾ, പാഠ്യേതര പ്രവർത്തനങ്ങൾ തുടങ്ങി വൈവിധ്യമാർന്ന വിവരങ്ങൾ അടങ്ങുന്നതാണ് സിവി.

ഒരു വ്യക്തി കടന്നു വന്ന പ്രൊഫഷണൽ വഴികൾ, അറിവ്, അനുഭവം എന്നിവയുടെ സമഗ്രമായ അവലോകനം അവതരിപ്പിക്കുക എന്നതാണ് സിവിയുടെ ആത്യന്തിക ലക്ഷ്യം. ഒരു വ്യക്തിയുടെ പ്രൊഫഷണലും വ്യക്തിഗതവുമായ വിവരങ്ങൾ പങ്കുവയ്ക്കാൻ CVക്ക് കഴിയണം. അതിനാൽ അത് ശ്രദ്ധാപൂർവ്വം തയ്യാറാക്കേണ്ടതുണ്ട്. ഒരു വ്യക്തിയുടെ നേട്ടങ്ങളും കഴിവുകളും പൂർണമായി മനസ്സിലാക്കാൻ ഇത് റിക്രൂട്ടർമാരെ സഹായിക്കുന്നു.

ഒരു ഉദ്യോഗാർത്ഥിയുടെ യോഗ്യതകൾ, പ്രവൃത്തി പരിചയം, നേട്ടങ്ങൾ, കഴിവുകൾ എന്നിവയുടെ സംക്ഷിപ്ത സംഗ്രഹമാണ് റെസ്യൂമെ. അതേസമയം ഇതെല്ലാം അവർ അപേക്ഷിക്കുന്ന ജോലിക്കും സ്ഥാനത്തിനും പ്രസക്തമായിരിക്കുകയും വേണം. സംഗ്രഹം എന്നർത്ഥം വരുന്ന ഫ്രഞ്ച് പദമാണ് Resume. ഇത് അപേക്ഷകന്റെ പ്രധാന യോഗ്യതകളിലും അവർ അപേക്ഷിക്കുന്ന സ്ഥാനത്തിന് ആവശ്യമായ പ്രത്യേകമായ പരിജ്ഞാനങ്ങളിലും ശ്രദ്ധ കേന്ദ്രീകരിക്കുന്നു. ഒരു ഇന്റർവ്യൂവിനായി മികച്ച അപേക്ഷകനെ തിരഞ്ഞെടുക്കാൻ കമ്പനിയെ സഹായിക്കുന്നു. ഏറ്റവും പുതിയ നേട്ടങ്ങളിൽ നിന്ന് പഴയ നേട്ടങ്ങളിലേക്ക് നീങ്ങുന്ന രീതിയിലാവണം റെസ്യൂമെ ആരംഭിക്കേണ്ടത്.