സംസ്ഥാനത്ത് കോവിഡ് കേസുകൾ കൂടുന്നു; ഗര്ഭിണികള്, പ്രായമായവര്, ജീവിതശൈലീ രോഗമുള്ളവർക്ക് മാസ്ക് നിർബന്ധം
- Published by:Naseeba TC
- news18-malayalam
Last Updated:
സ്വകാര്യ മേഖലയിലെ ആശുപത്രികള് മുമ്പത്തെപ്പോലെ കൃത്യമായി കോവിഡ് കേസുകള് റിപ്പോര്ട്ട് ചെയ്യണം
തിരുവനന്തപുരം: സംസ്ഥാനത്ത് കോവിഡ് കേസുകള് ചെറുതായി കൂടി വരുന്ന സാഹചര്യത്തില് പ്രതിരോധ പ്രവര്ത്തനങ്ങള് ശക്തിപ്പെടുത്താന് എല്ലാ ജില്ലകള്ക്കും നിര്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. കോവിഡ് കേസുകള് വര്ധിക്കുന്നത് മുന്നില് കണ്ടുള്ള സര്ജ് പ്ലാനുകള് എല്ലാ ജില്ലകളും തയ്യാറാക്കി. സ്വകാര്യ മേഖലയിലെ ആശുപത്രികള് മുമ്പത്തെപ്പോലെ കൃത്യമായി കോവിഡ് കേസുകള് റിപ്പോര്ട്ട് ചെയ്യേണ്ടതാണ്.
ആര്സിസി, എംസിസി, ശ്രീചിത്ര, സ്വകാര്യ ആശുപത്രികള് എന്നിവര് കോവിഡ് രോഗികള്ക്കായി പ്രത്യേകമായി കിടക്കകള് മാറ്റിവയ്ക്കണം. ആവശ്യകത മുന്നില് കണ്ട് പരിശോധനാ കിറ്റുകള്, സുരക്ഷാ സാമഗ്രികള് എന്നിവ സജ്ജമാക്കാന് കെ.എം.എസ്.സി.എല്.ന് നിര്ദേശം നല്കി. സംസ്ഥാനത്ത് സജ്ജമായ ഐസൊലേഷന് വാര്ഡുകളില് കോവിഡ് രോഗികളെ പ്രവേശിപ്പിച്ച് ചികിത്സ നല്കേണ്ടതാണ്. പൂര്ത്തിയാക്കാനുള്ള ഐസൊലേഷന് വാര്ഡുകള് എത്രയും വേഗം പ്രവര്ത്തനസജ്ജമാക്കാനും മന്ത്രി നിര്ദേശം നല്കി.
Also Read- രാജ്യത്ത് 24 മണിക്കൂറിനിടെ 3016 പുതിയ കോവിഡ് കേസുകള്; ആറ് മാസത്തിനിടയിലെ ഏറ്റവും ഉയര്ന്ന പ്രതിദിന നിരക്ക്
സംസ്ഥാനത്തെ കോവിഡ് സ്ഥിതി വിലയിരുത്തുന്നതിന് മന്ത്രി വീണാ ജോര്ജിന്റെ നേതൃത്വത്തില് ഉന്നതതല യോഗം ചേര്ന്നു. പ്രമേഹം, രക്താദിമര്ദം തുടങ്ങിയ ജീവിതശൈലി രോഗങ്ങളുള്ളവരും, ഗര്ഭിണികളും, പ്രായമായവരും, കുട്ടികളും പ്രത്യേകം ശ്രദ്ധിക്കണം. ഒരു മാസത്തിനിടെ 20 കോവിഡ് മരണം ഉണ്ടായിട്ടുള്ളതില് 60 വയസിന് മുകളില് പ്രായമുള്ളവരാണ് അധികവും. ഐസിയുവില് ചികിത്സയിലുള്ളവരിലധികവും പ്രായമുള്ളവരാണ്. അവരില് പ്രമേഹവും, രക്താദിമര്ദവും തുടങ്ങിയ ജീവിതശൈലി രോഗങ്ങളുള്ളവരാണ് അധികവും. പ്രമേഹം, രക്താദിമര്ദം തുടങ്ങിയ ജീവിതശൈലീ രോഗങ്ങളുള്ളവരും, പ്രായമായവരും, ഗര്ഭിണികളും, കുട്ടികളും മാസ്ക് കൃത്യമായി ധരിക്കണം. ഇവര് കോവിഡ് രോഗ ലക്ഷണങ്ങളുണ്ടെങ്കില് പരിശോധന നടത്തണം. ആശുപത്രികളിലും മാസ്ക് നിര്ബന്ധമാണ്. ആരോഗ്യ പ്രവര്ത്തകര് സുരക്ഷാ മാനദണ്ഡങ്ങള് കൃത്യമായി പാലിക്കണം.
advertisement
Also Read- ‘മാസ്ക്നെ’ ആണോ പ്രശ്നം? കോവിഡ് വീണ്ടും വർധിക്കുന്നതിനിടയിൽ ഇത് എങ്ങനെ തടയാം?
സംസ്ഥാനത്ത് ഫെബ്രുവരിയില് കേസുകള് തീരെ കുറവായിരുന്നു. എന്നാല് മാര്ച്ച് മാസത്തോടെയാണ് കേസുകളില് നേരിയ വര്ധനവുണ്ടായത്. ഇന്ന് 765 കോവിഡ് കേസുകളാണ് റിപ്പോര്ട്ട് ചെയ്തത്. എറണാകുളം, തിരുവനന്തപുരം ജില്ലകളിലാണ് കോവിഡ് കേസുകള് കൂടുതല്. മരണം റിപ്പോര്ട്ട് ചെയ്യുന്നതില് കാലതാമസം പാടില്ല. ജനിതക പരിശോധനയ്ക്ക് അയച്ചതില് കൂടുതലും ഒമിക്രോണാണ് കണ്ടെത്തിയിട്ടുള്ളത്. ജനിതക പരിശോധന വര്ധിപ്പിക്കാനും മന്ത്രി നിര്ദേശം നല്കി.
advertisement
ആരോഗ്യ വകുപ്പ് പ്രിന്സിപ്പല് സെക്രട്ടറി, ആരോഗ്യ വകുപ്പ് ഡയറക്ടര്, മെഡിക്കല് വിദ്യാഭ്യാസ വകുപ്പ് ഡയറക്ടര്, അഡീഷണല് ഡയറക്ടര്മാര്, ഡെപ്യൂട്ടി ഡയറക്ടര്മാര്, സ്റ്റേറ്റ് മെഡിക്കല് ബോര്ഡ് അംഗങ്ങള്, ജില്ലാ മെഡിക്കല് ഓഫീസര്മാര്, ജില്ലാ പ്രോഗ്രാം മാനേജര്മാര്, മെഡിക്കല് കോളേജ് പ്രിന്സിപ്പല്മാര്, സൂപ്രണ്ടുമാര് എന്നിവര് യോഗത്തില് പങ്കെടുത്തു.
Location :
Thiruvananthapuram,Thiruvananthapuram,Kerala
First Published :
Mar 30, 2023 6:52 PM IST
മലയാളം വാർത്തകൾ/ വാർത്ത/Corona/
സംസ്ഥാനത്ത് കോവിഡ് കേസുകൾ കൂടുന്നു; ഗര്ഭിണികള്, പ്രായമായവര്, ജീവിതശൈലീ രോഗമുള്ളവർക്ക് മാസ്ക് നിർബന്ധം
