രണ്ടര വയസുകാരിയെ പീഡിപ്പിച്ച പ്രതിക്ക് മരണം വരെ തടവ് ശിക്ഷ വിധിച്ച് പോക്സോ കോടതി

കണ്ണൂര്‍: രണ്ടര വയസുകാരിയെ പീഡിപ്പിച്ച പ്രതിക്ക് മരണം വരെ തടവ് ശിക്ഷയും പിഴയും വിധിച്ച് തളിപ്പറമ്പ് പോക്സോ (POCSO) അതിവേഗ കോടതി. പരിയാരം സ്വദേശിയായ മധ്യവയസ്‌ക്കനാണ് പ്രതി. പരിയാരം പോലീസ് സ്റ്റേഷൻ പരിധിയിലെ രണ്ടര വയസ്സുകാരിയെയാണ് പ്രതി ലൈംഗികമായി പീഡിപ്പിച്ചത്. 2016 ആഗസ്റ്റിലായിരുന്നു കേസിനാസ്പദമായ സംഭവം. സംഭവത്തിൽ ആറ് വർഷത്തിന് ശേഷമാണ് വിചാരണ കോടതി പ്രതിക്ക് ശിക്ഷ വിധിച്ചത്. തളിപ്പറമ്പ് ഫാസ്റ്റ് ട്രാക്ക് സ്പെഷ്യൽ കോടതി ജഡ്ജി സി. മുജീബ് റഹ്മാനാണ് ശിക്ഷിച്ചത്. വിവിധ വകുപ്പുകൾപ്രകാരമുള്ള കേസിൽ ജീവപര്യന്തവും പത്തുവർഷവുമായി ശിക്ഷ വേറെയുമുണ്ട്. പീഡനത്തിന് ഇരയായ കുഞ്ഞിനെ തിരിച്ചറിയാതിരിക്കാൻ പ്രതിയുടെ പേരോ ഉണ്ടായ സംഭവങ്ങളോ വെളിപ്പെടുത്തരുതെന്ന് കോടതി കര്‍ശന നിര്‍ദേശം നല്‍കിയിട്ടുണ്ട്.