മദ്യത്തിന് യഥാർത്ഥ വിലയേക്കാൾ പത്ത് രൂപ കൂടുതൽ വാങ്ങി; ചോദ്യം ചെയ്ത യുവാവിന് ക്രൂരമർദനം

മദ്യത്തിന് യഥാർത്ഥ വിലയേക്കാൾ പത്ത് രൂപ കൂടുതൽ വാങ്ങിയെന്നാരോപിച്ചുള്ള തർക്കത്തെത്തുടർന്ന് മദ്യവിൽപ്പനക്കാരന്റെ മർദനത്തിന് ഇരയായതായി ബംഗളൂരു സ്വദേശിയുടെ പരാതി. ജനുവരി രണ്ടിന് വൈകിട്ട് 4 മണിയോടെയാണ് സംഭവം. മഞ്ജുനാഥ് നഗറിലുള്ള ഗണപതി വൈൻസിൽ മദ്യം വാങ്ങാൻ എത്തിയതാണ് 38 കാരനായ ത്രിലോക്. 40 രൂപയുടെ 90 മില്ലി മദ്യക്കുപ്പിയ്ക്ക് ജീവനക്കാരൻ 50 രൂപ ഈടാക്കി എന്നാണ് ത്രിലോകിന്റെ പരാതി. അതിനെ ചോദ്യം ചെയ്തുള്ള തർക്കത്തിലാണ് ത്രിലോകിന് മർദനമേറ്റത്. ആശുപത്രിയിൽ പ്രവേശിപ്പിച്ച ത്രിലോകിന്റെ തലയ്ക്ക് സാരമായി പരിക്കേറ്റിട്ടുണ്ട്. മുറിവിൽ 18 തുന്നലുകളാണുള്ളത്.