ട്രംപിന്റെ 20 ഇന സമാധാന പദ്ധതി; ഹമാസിന് എന്ത് സംഭവിക്കും? ഗാസയെ ആര് ഭരിക്കും?

സമാധാന പദ്ധതിയുടെ ആദ്യ ഘട്ടം ഒരു വലിയ കൈമാറ്റത്തെ കുറിച്ചാണ് പറയുന്നത്. ജീവിച്ചിരിക്കുന്നതോ മരിച്ചവരോ ആയിട്ടുള്ള എല്ലാ ഇസ്രായേലി ബന്ദികളെയും 72 മണിക്കൂറിനുള്ളില്‍ ഹമാസ് ഇസ്രായേല്‍ സ്വീകാര്യതയോടെ മോചിപ്പിക്കണമെന്നാണ് ഒരു നിര്‍ദ്ദേശം. ഇതിന് പകരമായി ജീവപര്യന്തം തടവ് അനുഭവിക്കുന്ന 250 പാലസ്തീനികളെ ഇസ്രായേലും മോചിപ്പിക്കും. 2023 ഒക്ടോബര്‍ ഏഴിന് ശേഷം തടവിലാക്കപ്പെട്ട 1,700 ഗാസക്കാരെയും സംഘര്‍ഷം ആരംഭിച്ച ശേഷം അറസ്റ്റിലായ സ്ത്രീകളെയും കുട്ടികളെയും ഉള്‍പ്പെടെ മോചിപ്പിക്കും. മരണപ്പെട്ട ഇസ്രായേല്‍ പൗരന്മാരുടെ മൃതദേഹങ്ങള്‍ കൈമാറുമ്പോള്‍ 15 പാലസ്തീന്‍കാരുടെ മൃതദേഹാവശിഷ്ഠങ്ങള്‍ ഇസ്രായേലും കൈമാറും.

ഭാവിയില്‍ ഗാസയുടെ ഭരണച്ചക്രം തിരിക്കുന്നതില്‍ ഹമാസിന് ഒരു പങ്കും ഉണ്ടാകില്ലെന്നാണ് ട്രംപിന്റെ 20 ഇന സമാധാന പദ്ധതി വ്യക്തമായി പറയുന്നത്. നേരിട്ടോ അല്ലാതെയോ അനുബന്ധ ഗ്രൂപ്പുകള്‍ വഴിയോ ഗാസയുടെ ഭാവി ഭരണത്തില്‍ ഹമാസിന് സ്ഥാനമുണ്ടാകില്ലെന്ന് പദ്ധതി വ്യക്തമാക്കുന്നു. ഇസ്രായേലിന്റെ ദീര്‍ഘകാല ആവശ്യമാണ് ഈ പോയിന്റ് അഭിസംബോധന ചെയ്യുന്നത്. കൂടാതെ തീവ്രവാദ വിമുക്ത മേഖലയായി ഗാസയെ മാറ്റുമെന്ന ട്രംപിന്റെ വളരെക്കാലമായുള്ള ആഗ്രഹം കൂടി ഇതില്‍ പ്രതിഫലിക്കുന്നുണ്ട്.

സംഘര്‍ഷം അവസാനിച്ചുകഴിഞ്ഞാല്‍ ഗാസയെ നിയന്ത്രിക്കുന്നതിന് രണ്ട് തലങ്ങളിലുള്ള അതോറിറ്റി സൃഷ്ടിക്കുക എന്നതാണ് ട്രംപ് മുന്നോട്ടുവെക്കുന്ന നിര്‍ദ്ദേശത്തിന്റെ പ്രധാന സവിശേഷത. ഹമാസിനെ അധികാരത്തില്‍ നിന്നും മാറ്റിനിര്‍ത്തിയാലും അധികാര ശൂന്യത തടയുക എന്ന ലക്ഷ്യത്തോടെയാണിത്.

പ്രാദേശിക തലത്തില്‍ ദൈനംദിന ഭരണം കൈകാര്യം ചെയ്യുന്നത് യോഗ്യരായ പ്രൊഫഷണലുകളും അന്താരാഷ്ട്ര വിദഗ്ധരുടെ പിന്തുണയുള്ളതുമായ ഒരു സാങ്കേതിക, അരാഷ്ട്രീയ പാലസ്തീന്‍ സമിതിയായിരിക്കും. ആശുപത്രികളും സ്‌കൂളുകളും നടത്തുന്നത് മുതല്‍ വൈദ്യുതി, വെള്ളം, മുനിസിപ്പല്‍ സംവിധാനങ്ങള്‍ എന്നിവ കൈകാര്യം ചെയ്യുന്നതുവരെയുള്ള പൊതുസേവനങ്ങളില്‍ ഈ സമിതി കര്‍ശനമായി ശ്രദ്ധകേന്ദ്രീകരിക്കും.

പാലസ്തീൻ സമിതിയുടെ മേല്‍നോട്ടം വഹിക്കുന്നത് ട്രംപിന്റെ തന്നെ അധ്യക്ഷതയിലുള്ള ഒരു അന്താരാഷ്ട്ര ഇടക്കാല സമിതിയായിരിക്കും. ഭരണ ചട്ടക്കൂടുകള്‍ രൂപീകരിക്കുന്നതും പുനര്‍നിര്‍മ്മാണ ധനസഹായം ഏകോപിപ്പിക്കുന്നതും സഹായം സായുധ ഗ്രൂപ്പുകളിലേക്ക് വഴിതിരിച്ചുവിടുന്നില്ലെന്ന് ഉറപ്പാക്കുന്നതും ഈ ബോര്‍ഡിന്റെ ചുമതലയാണ്. യുകെ മുന്‍ പ്രധാനമന്ത്രി ടോണി ബ്ലെയറിനെ ബോര്‍ഡിലെ അംഗങ്ങളില്‍ ഒരാളായി തിരഞ്ഞെടുത്തിട്ടുണ്ട്. മറ്റ് രാഷ്ട്രത്തലവന്മാരും ഇതില്‍ അംഗങ്ങളാകുമെന്നാണ് പ്രതീക്ഷിക്കുന്നത്.

മാനുഷിക സഹായമാണ് അടിയന്തര മുന്‍ഗണനയായി മുന്നോട്ടുവെക്കുന്നത്. കരാര്‍ ഇരുപക്ഷവും അംഗീകരിച്ചുകഴിഞ്ഞാല്‍ താഴെ പറയുന്ന കാര്യങ്ങള്‍ ഉറപ്പാക്കും.

ഒരു അന്താരാഷ്ട്ര സുരക്ഷാ സേന (ഐഎസ്എഫ്) വിന്യസിപ്പിക്കുന്നതിനുള്ള നിര്‍ദ്ദേശവും കരാറിലുണ്ട്. പാലസ്തീന്‍ പോലീസിനെ പരിശീലിപ്പിക്കുകയും പിന്തുണയ്ക്കുകയും ചെയ്യുക, ഇസ്രായേലുമായും ഈജിപ്തുമായും സഹകരിച്ച് ഗാസയുടെ അതിര്‍ത്തികള്‍ സുരക്ഷിതമാക്കല്‍, ഗാസയിലേക്കുള്ള ആയുധക്കടത്ത് തടയല്‍, ചരക്കുകളുടെയും സഹായങ്ങളുടെയും സുരക്ഷിതമായ നീക്കം സാധ്യമാക്കല്‍ എന്നിവയാണ് ഈ സേനയുടെ ഉത്തരവാദിത്തങ്ങള്‍

പലസ്തീന്‍ ഒരു രാജ്യമായി ട്രംപിന്റെ പദ്ധതിയില്‍ അംഗീകരിക്കുന്നില്ല. പക്ഷേ അത് ഒരു അഭിലാഷമായി അംഗീകരിക്കുന്നു. നിര്‍ദ്ദിഷ്ട കാര്യങ്ങള്‍ നടപ്പായാല്‍ ഭാവിയില്‍ അതിലേക്ക് എത്താനുള്ള സാധ്യയുണ്ടായേക്കാമെന്ന് അവ്യക്തമായി സൂചന നല്‍കുന്നു.