ഇസ്രായേല്‍ - പലസ്തീന്‍ പ്രശ്നം തുടങ്ങിയത് എങ്ങനെ? ഇപ്പോൾ ഹമാസ് എന്തുകൊണ്ട് ആക്രമിച്ചു?

1917ലെ ബാല്‍ഫര്‍ പ്രഖ്യാപനമാണ് ഇസ്രായേല്‍ എന്ന രാജ്യം രൂപീകരിക്കാന്‍ കാരണമായത്. ഒന്നാം ലോകമഹായുദ്ധകാലത്ത് ഓട്ടോമന്‍ സാമ്രാജ്യത്വത്തിന്റെ അധീനതയിലായിരുന്ന പലസ്തീന്‍ രാജ്യത്തെ ബ്രിട്ടണ്‍ തങ്ങളുടെ വരുതിയിലാക്കി. ഇതിനായി തങ്ങളോടൊപ്പം നിലനിന്ന ജൂതര്‍ക്ക് പലസ്തീനില്‍ ഒരു രാജ്യം നിര്‍മ്മിക്കാനുള്ള ആവശ്യത്തെ ബ്രിട്ടന്‍ അംഗീകരിക്കുകയും ചെയ്തു.

1967ല്‍ ഇസ്രായേല്‍ ഈജിപ്റ്റിനും സിറിയയ്ക്കുമെതിരെ വ്യോമാക്രമണം നടത്തി. ആറ് ദിവസം നീണ്ടുനിന്ന യുദ്ധമായിരുന്നു ഇത്. ഈ ആക്രമണത്തിലൂടെ സിനായ്, ഗാസാ മുനമ്പ്, വെസ്റ്റ് ബാങ്ക്, ജറുസലേം, ഗോലാന്‍ കുന്നുകള്‍ എന്നിവ പിടിച്ചെടുക്കാന്‍ ഇസ്രായേലിന് കഴിഞ്ഞു. ഈ പ്രദേശങ്ങളിലേക്ക് ജൂതവിശ്വാസികള്‍ കുടിയേറാനും തുടങ്ങി. ഇന്നും ഈ കുടിയേറ്റം തുടരുന്നു.

1979കളിലാണ് ചില സമാധാനകരാറുകളും വെടിനിര്‍ത്തല്‍ പ്രഖ്യാപനങ്ങളും ഉടലെടുത്തത്. ഈജിപ്റ്റില്‍ നിന്നും ഇസ്രായേലില്‍ നിന്നുമുള്ള പ്രതിനിധികള്‍ ക്യാംപ് ഡേവിഡ് ഉടമ്പടിയില്‍ ഒപ്പുവെയ്ക്കുകയും ഇരു രാജ്യങ്ങളും തമ്മിലുള്ള മൂന്ന് ദശാബ്ദക്കാലത്തെ സംഘര്‍ഷത്തിന് അവസാനം കുറിക്കുകയും ചെയ്തു. ഈ ഉടമ്പടിയോടെ ഇസ്രായേലും അയല്‍രാജ്യങ്ങളും തമ്മിലുള്ള സംഘര്‍ഷം അവസാനിച്ചു. എന്നാല്‍ അപ്പോഴും പലസ്തീന്‍ വിഷയം കെട്ടടങ്ങിയിരുന്നില്ല.

1987ല്‍ ഒന്നാം ഇന്‍തിഫാദയ്ക്ക് തുടക്കം കുറിച്ചു. ഇസ്രായേല്‍ ഭരണത്തിനെതിരെ നൂറുകണക്കിന് പലസ്തീന്‍ വംശജര്‍ നടത്തിയ മുന്നേറ്റമാണ് ഒന്നാം ഇന്‍തിഫാദ. ഗാസ മുനമ്പിലെയും വെസ്റ്റ് ബാങ്കിലേയും പലസ്തീന്‍ വംശജരാണ് ഈ പ്രതിരോധത്തില്‍ മുന്നിട്ട് നിന്നത്.

2000ല്‍ പലസ്തീനികള്‍ വീണ്ടും രണ്ടാം ഇന്‍തിഫാദ ആരംഭിച്ചു. ഇതേവര്‍ഷം സെപ്റ്റംബറില്‍ ഇസ്രായേല്‍ പ്രധാനമന്ത്രിയായിരുന്ന ഏരിയല്‍ ഷാരോണ്‍ കിഴക്കന്‍ ജറുസലേമിലെ അല്‍-അഖ്‌സ മസ്ജിദിൽ സന്ദര്‍ശനം നടത്തി. ഇസ്ലാം വംശജരുടെ വിശുദ്ധ സ്ഥലങ്ങളിലൊന്നായിരുന്നു ഇത്. ജൂതവിശ്വാസികളുടെ വിശുദ്ധ സ്ഥലം കൂടിയായിരുന്നു അല്‍ അഖ്‌സ. ഇക്കാരണങ്ങളുടെ ഭാഗമായുണ്ടായ രണ്ടാം ഇന്‍തിഫാദ 2005വരെ നീണ്ടുനിന്നു. നിരവധി ചാവേര്‍ ആക്രമണങ്ങളും ഇതോടനുബന്ധിച്ച് നടന്നു. 2002ല്‍ ഇസ്രായേല്‍ വെസ്റ്റ് ബാങ്ക് ആക്രമിച്ചു.

2013ല്‍ ഇസ്രായേല്‍ സര്‍ക്കാരും പലസ്തീന്‍ അതോറിറ്റിയും തമ്മിലുള്ള സമാധാന ചര്‍ച്ചകള്‍ പുനരുജ്ജീവിപ്പിക്കാന്‍ അമേരിക്ക ശ്രമിച്ചു. എന്നാല്‍ സമാധാനചര്‍ച്ചകള്‍ പരാജയമായിരുന്നു. കാരണം 2014ല്‍ അന്നത്തെ പലസ്തീന്‍ ഭരണകക്ഷിയായ ഫത ഹമാസുമായി ചേര്‍ന്ന് ഒരു ഐക്യസര്‍ക്കാര്‍ രൂപീകരിച്ചതോടെ സമാധാന ചര്‍ച്ചകള്‍ക്ക് അന്ത്യം കുറിച്ചു.

2014ല്‍ ഇസ്രായേല്‍ സൈന്യവും ഹമാസും തമ്മില്‍ സൈനിക ഏറ്റമുട്ടലുണ്ടായിരുന്നു. ഹമാസിന്റെ റോക്കറ്റാക്രമണം തടയാന്‍ ഇസ്രായേലും മുന്നിട്ട് നിന്നു. ഹമാസ് ഇസ്രായേലിന് എതിരെ മൂവായിരത്തോളം റോക്കറ്റുകള്‍ തൊടുത്തുവിട്ടു. പകരം ഗാസയില്‍ ഇസ്രായേല്‍ കനത്ത ആക്രമണം അഴിച്ചുവിട്ടു. 2014 ആഗസ്റ്റിലാണ് ഇരുരാജ്യങ്ങളുടേയും ആക്രമണത്തിന് ഒരറുതിയായത്. ഈജിപ്റ്റിന്റെ മധ്യസ്ഥതയില്‍ ചേര്‍ന്ന സമാധാന കരാറിന്റെ അടിസ്ഥാനത്തില്‍ ഇരുരാജ്യങ്ങളും വെടിനിര്‍ത്തല്‍ പ്രഖ്യാപിച്ചു. സംഘര്‍ഷത്തില്‍ 2,251 പലസ്തീനികളാണ് കൊല്ലപ്പെട്ടത്. 73 ഇസ്രായേല്‍ വംശജരും കൊല്ലപ്പെട്ടു.

2017 ഡിസംബര്‍ ആറിന് ജറുസലേമിനെ അംഗീകരിച്ച് അമേരിക്കന്‍ പ്രസിഡന്റ് ഡോണാള്‍ഡ് ട്രംപ് രംഗത്തെത്തി. ജറുസലേമിനെ ഇസ്രായേലിന്റെ തലസ്ഥാനമായി അംഗീകരിക്കുന്നുവെന്നായിരുന്നു അദ്ദേഹം പറഞ്ഞത്. ഇത് ആഗോളതലത്തില്‍ നിരവധി വിമര്‍ശനങ്ങള്‍ക്കിടയായാക്കി.

2021ല്‍ ഇസ്രായേല്‍ പോലീസ് ജറുസലേമിലെ അല്‍ അഖ്‌സ പള്ളി റെയ്ഡ് ചെയ്തു. ഇത് ഇസ്രായേലും ഹമാസും തമ്മില്‍ വീണ്ടുമൊരു ഏറ്റുമുട്ടലിന് വഴിയൊരുക്കി. ഏകദേശം 11 ദിവസം നീണ്ടുനിന്ന യുദ്ധത്തില്‍ 200ലധികം പലസ്തീന്‍ പൗരന്‍മാരാണ് കൊല്ലപ്പെട്ടത്. 10ലധികം ഇസ്രായേല്‍ പൗരന്‍മാരും സംഘര്‍ഷത്തില്‍ കൊല്ലപ്പെട്ടു.