ചെലവ് ഒരു ദിവസം 7000 കോടിയിലേറെ; ഇറാനുമായുള്ള സംഘർഷം അമേരിക്കയെ ബാധിക്കുന്നതെങ്ങനെ?

Published by:Rajesh V
news18-malayalam

Last Updated:Mar 03, 2026 7:52 PM IST

യുദ്ധം അത്യന്തം ചിലവേറിയതാണ്. 'ഓപ്പറേഷൻ എപ്പിക് ഫ്യൂറി' എന്ന് പേരിട്ടിരിക്കുന്ന ഈ യുദ്ധം ലോക വിപണിയെയും അമേരിക്കൻ ജനതയുടെ സാമ്പത്തിക സ്ഥിതിയെയും സാരമായി ബാധിക്കുന്നതെങ്ങനെയെന്ന് ഈ റിപ്പോർട്ട് വ്യക്തമാക്കുന്നു

പഥികൃത് സെൻ ഗുപ്ത

ടെഹ്റാനിലെ ഭരണസിരാകേന്ദ്രങ്ങളിൽ യുഎസ് നടത്തിയ ശക്തമായ ആക്രമണങ്ങളുടെ പുകയടങ്ങുന്നതിന് മുമ്പ് തന്നെ, ആഗോള വിപണിയിൽ ഇതിന്റെ പ്രത്യാഘാതങ്ങൾ പ്രകടമായിത്തുടങ്ങി. ഇറാനെതിരെയുള്ള യുഎസ് നേതൃത്വത്തിലുള്ള ഈ സൈനിക നീക്കം വെറുമൊരു പോരാട്ടം മാത്രമല്ല, അതൊരു വലിയ സാമ്പത്തിക പ്രതിസന്ധിക്ക് കൂടിയാണ് തുടക്കമിടുന്നത്. പെന്റഗണിലെ അത്യാധുനിക മുറികൾ മുതൽ അമേരിക്കയിലെ സാധാരണക്കാരന്റെ പെട്രോൾ പമ്പുകളിൽ വരെ ഇതിന്റെ പ്രതിഫലനം അനുഭവപ്പെടുന്നു.

പെന്റഗണിന്റെ 'ദൈനംദിന ചിലവ്'

ഓപ്പറേഷൻ എപ്പിക് ഫ്യൂറി ചരിത്രത്തിലെ തന്നെ ഏറ്റവും വലിയ ചിലവേറിയ യുദ്ധങ്ങളിലൊന്നാണ്. ബി-2 സ്പിരിറ്റ് സ്റ്റെൽത്ത് ബോംബറുകൾ, എഫ്-35 യുദ്ധവിമാനങ്ങൾ എന്നിവയുൾപ്പെടെയുള്ള അത്യാധുനിക ആയുധങ്ങളുടെ ഉപയോഗം മൂലം പ്രതിദിനം ഏകദേശം 850 ദശലക്ഷം ഡോളർ (ഏകദേശം 7,000 കോടിയിലധികം രൂപ) അമേരിക്കയ്ക്ക് ചിലവാകുന്നുണ്ടെന്നാണ് കണക്കാക്കുന്നത്.

ഒരു ടോമാഹോക്ക് ക്രൂയിസ് മിസൈലിന് ഏകദേശം 2 ദശലക്ഷം ഡോളറാണ് വില. യുദ്ധത്തിന്റെ ആദ്യഘട്ടത്തിൽ തന്നെ നൂറുകണക്കിന് മിസൈലുകളാണ് വിക്ഷേപിച്ചത്. കൂടാതെ, അറേബ്യൻ കടലിൽ രണ്ട് യുദ്ധക്കപ്പലുകളെ വിന്യസിക്കാൻ മാത്രം പ്രതിദിനം 15 ദശലക്ഷം ഡോളറിലധികം ചിലവുണ്ട്. ഈ അധിക ചിലവ് നേരിടാൻ അമേരിക്കൻ കോൺഗ്രസിനോട് അടിയന്തര ബജറ്റ് പെന്റഗൺ ആവശ്യപ്പെട്ടുകഴിഞ്ഞു.

ഹോർമുസ് നികുതിയും അമേരിക്കൻ കീശയും

യുദ്ധത്തിന്റെ യഥാർത്ഥ ആഘാതം അമേരിക്കൻ ഉപഭോക്താക്കൾ അറിയുന്നത് പെട്രോൾ പമ്പുകളിലാണ്. ലോകത്തിലെ പെട്രോളിയം വിതരണത്തിന്റെ 21 ശതമാനവും കടന്നുപോകുന്ന ഹോർമുസ് കടലിടുക്ക് ഇപ്പോൾ സാമ്പത്തിക യുദ്ധത്തിന്റെ വേദിയായി മാറി. ഇറാന്റെ പ്രത്യാക്രമണങ്ങളെത്തുടർന്ന് അസംസ്‌കൃത എണ്ണവില 18 ശതമാനം വർധിച്ച് ബാരലിന് 90 ഡോളർ കടന്നു. ഇത് അമേരിക്കയിലെ ഇന്ധനവില ഗാലന് 45 മുതൽ 60 സെന്റ് വരെ വർധിപ്പിച്ചു. ഇത് രാജ്യത്തെ പണപ്പെരുപ്പം വീണ്ടും വർധിക്കാൻ കാരണമായേക്കാം.

പ്രതിരോധത്തിന് വേണ്ടിവരുന്ന ഭീമമായ തുക

ആക്രമിക്കുന്നതിനേക്കാൾ ചിലവേറിയതാണ് ഇറാനിൽ നിന്നുള്ള മിസൈലുകളെയും ഡ്രോണുകളെയും പ്രതിരോധിക്കുന്നത്. വെറും 30,000 ഡോളർ മാത്രം വിലയുള്ള ഇറാന്റെ 'ഷാഹീദ്' ഡ്രോണുകളെ വെടിവെച്ചിടാൻ അമേരിക്ക ഉപയോഗിക്കുന്നത് 2 മുതൽ 4 ദശലക്ഷം ഡോളർ വരെ വിലയുള്ള മിസൈലുകളാണ്. ഈ അസമമായ സാമ്പത്തിക വിനിമയം അമേരിക്കൻ പ്രതിരോധ ബജറ്റിന് വലിയ ബാധ്യതയാകുന്നു.

ഭാവിയിലെ പ്രത്യാഘാതങ്ങൾ

ആയുധങ്ങൾക്കും ഇന്ധനത്തിനും പുറമെ, യുദ്ധത്തിൽ പങ്കെടുക്കുന്ന സൈനികരുടെ ആരോഗ്യപരിരക്ഷയ്ക്കും ആനുകൂല്യങ്ങൾക്കുമായി വരുംകാലങ്ങളിൽ കോടിക്കണക്കിന് ഡോളർ അധികമായി കണ്ടെത്തേണ്ടി വരും. ചുരുക്കത്തിൽ, 2026ൽ ടെഹ്‌റാനിൽ നടക്കുന്ന ഓരോ മിസൈൽ ആക്രമണത്തിന്റെയും ആഘാതം അമേരിക്കയിലെ ഓരോ സാധാരണക്കാരന്റെയും കുടുംബ ബജറ്റിലും നിഴലിക്കുന്നു.

Summary: The US-led military campaign against Iran, dubbed Operation Epic Fury, is proving to be a staggering financial burden. Beyond the tactical battlefield, the conflict has evolved into a massive fiscal event, costing the US an estimated $850 million per day in operational overheads, fuel, and precision munitions. High-tech sorties involving B-2 bombers and F-35s, alongside the launch of multimillion-dollar Tomahawk missiles, are forcing an emergency budget request from Congress.