Abraham Ozler review | പുതുവർഷത്തിന് സ്റ്റാർട്ട്, ആക്ഷൻ പറഞ്ഞ് തിയേറ്ററിൽ സീനിയേഴ്‌സിന്റെ ആറാട്ട്; എബ്രഹാം ഓസ്‌ലർ റിവ്യൂ

രണ്ടു വർഷം അത്ര വലിയ കാലഘട്ടമല്ലായിരിക്കാം. എന്നിരുന്നാലും, ഇത്രയും നാളായി മലയാള ചലച്ചിത്രമേഖലയുടെ അടയാളമായി മാറിയ മുഖങ്ങളിൽ ഒരാളായ ജയറാം (Jayaram) സ്വന്തം നാടിന്റെ സിനിമയിൽ നിന്നും വിട്ടു നിൽക്കുകയായിരുന്നു എന്ന ഓർമ്മപ്പെടുത്തൽ ഉണ്ടായത് കുറച്ചുനാളുകൾക്ക് മുൻപ് എബ്രഹാം ഓസ്‌ലർ പ്രഖ്യാപിച്ച വേളയിൽ മാത്രമാണ്. മലയാള ചലച്ചിത്ര മേഖലയിൽ പുതുവർഷമായ 2024ന് തുടക്കവും, ആ ഇടവേളയുടെ അവസാനവും ഒന്നിച്ചുണ്ടായിരിക്കുന്നു. പഴയ ജയറാമാണോ തിരികെ വന്നത് എന്ന് ചോദിച്ചാൽ ആണെന്ന് ഉറപ്പിക്കാൻ സാധ്യമല്ല. അതിനേക്കാൾ എത്രയോ മാറിയ ഒരു ജയറാമിനെയാണ് എ.സി.പി. എബ്രഹാം ഓസ്ലറിലൂടെ മിഥുൻ മാനുവൽ തോമസ് മലയാള സിനിമയ്ക്ക് മടക്കിനൽകിയത്!