'രാജമൗലിയുടെ സിനിമകളില്‍ എവിടെയാണ് ലോജിക്, കാഴ്ച്ചക്കാരെ വിശ്വസിപ്പിക്കലാണ് പ്രധാനം'-കരണ്‍ ജോഹര്‍

ബോളിവുഡിലെ പ്രമുഖ സംവിധായകനും നിർമ്മാതാവുമായ കരൺ ജോഹർ, എസ് എസ് രാജമൗലിയുടെ സിനിമകളിലെ ലോജിക്കിന്റെ അഭാവത്തെക്കുറിച്ച് തുറന്ന് സംസാരിച്ചു. യൂട്യൂബ് ചാനലായ ഗെയിം ചെയ്ഞ്ചേഴ്സിന് വേണ്ടി നടത്തിയ കോമൾ മെഹ്തയുമായുള്ള അഭിമുഖത്തിലാണ് അദ്ദേഹം രാജമൗലി ചിത്രങ്ങളെ കുറിച്ച് സംസാരിച്ചത്.  രാജമൗലിയുടെ ബാഹുബലി രണ്ട് ഭാഗങ്ങളും ഉത്തരേന്ത്യൻ വിതരണച്ചുമതല വഹിച്ചത് കരൺ ജോഹർ ആണ്. സിനിമയിൽ ലോജിക്കിനെ പിൻസീറ്റിലേക്ക് മാറ്റിയാൽ പകരം എന്തായിരിക്കും എന്ന ചോദ്യത്തിന് ഉത്തരമായി കരൺ ജോഹർ ചൂണ്ടിക്കാണിച്ചത് രാജമൗലിയുടെ ആർആർആർ എന്ന ചിത്രമാണ്. ആർആർആറിന് പുറമെ അനിമൽ, ഗദർ തുടങ്ങിയ ചിത്രങ്ങളെയും അദ്ദേഹം ഈ വിഭാഗത്തിൽ ഉൾപ്പെടുത്തി. ലോജിക്കിന് പകരം സംവിധായകന്റെ ബോധ്യമാണ് ഇത്തരം സിനിമകളുടെ വിജയരഹസ്യമെന്നും അദ്ദേഹം കൂട്ടിച്ചേർത്തു.