Idly Kadai| ധനുഷ് ചിത്രത്തിന്റെ തേനിയിലെ സെറ്റില്‍ വൻ തീപിടിത്തം; വീഡിയോ പുറത്ത്

ധനുഷ് നായകനും സംവിധായകനുമായി എത്തുന്ന സിനിമയാണ് 'ഇഡ്‍ലി കടൈ'. ചിത്രത്തിന്റെ സെറ്റില്‍ വലിയ തീപിടിത്തമുണ്ടായി എന്ന റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്. ആര്‍ക്കും പരിക്കില്ലെന്നാണ് വിവരം. തമിഴ്നാട് തേനിയിലെ ആണ്ടിപ്പട്ടിയിലെ സെറ്റിലാണ് സംഭവം. ചെറിയ തീപിടിത്തം ശക്തമായ കാറ്റിൽ പടർന്നു പിടിക്കുകയായിരുന്നു. തുടർന്ന് അഗ്നിശമന സേന എത്തി തീ അണച്ചു. അടുത്തഘട്ട ചിത്രീകരണം മറ്റൊരു പ്രദേശത്തേക്ക് മാറ്റിയിരുന്നുവെങ്കിലും ഇവിടത്തെ സെറ്റ് പൊളിച്ചുനീക്കിയിരുന്നില്ല. ധനുഷിന്റെ ആരാധകർക്കിടയിൽ തീപിടിത്ത വാർത്ത ആദ്യം ആശങ്കയ്ക്ക് കാരണമായി. എന്നാൽ ധനുഷ് ഉൾപ്പെടെ സിനിമാ സംഘത്തിലെ ആരും സ്ഥലത്തുണ്ടായിരുന്നില്ലെന്ന റിപ്പോർട്ട് പുറത്തുവന്നതോടെ ആരാധകർക്ക് ആശ്വാസമായി.