അഹാനയും ഷൈൻ ടോം ചാക്കോയും വേഷമിട്ട് ദുൽഖർ നിർമ്മിച്ച സിനിമയുടെ ചിത്രീകരണം പൂർത്തിയായി

ചിത്രത്തിൽ ഷൈൻ ടോം ചാക്കോ, ധ്രുവൻ, അഹാന കൃഷ്ണ എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ബിറ്റോ ഡേവിസ്, ശ്രീകാന്ത് ദാസൻ എന്നിവരും ചിത്രത്തിൽ അഭിനയിക്കുന്നുണ്ട്.

കോവിഡ് മാനദണ്ഡങ്ങൾ പൂർണമായും പാലിച്ചാണ് ചിത്രീകരണം പൂർത്തിയാക്കിയത്. ലില്ലി, അന്വേഷണം എന്നീ ചിത്രങ്ങൾ ഒരുക്കിയ പ്രശോഭ് വിജയനാണ് ചിത്രത്തിന്റെ സംവിധാനം. ഇഷ്‌കിന്റെ തിരക്കഥാകൃത്ത് രതീഷ് രവിയുടേതാണ് തിരക്കഥ.

96ന് സംഗീതം ഒരുക്കിയ ഗോവിന്ദ് വസന്ത ചിത്രത്തിന്റെ സംഗീത സംവിധാനവും ഫായിസ് സിദ്ധിഖ് ഛായാഗ്രഹണവും നിർവഹിക്കുന്നു. ആലുവയിലും പരിസര പ്രദേശങ്ങളിലുമായി 50 ദിവസങ്ങൾ കൊണ്ടാണ് ചിത്രീകരണം പൂർത്തിയാക്കിയത്.

ഡിജിറ്റൽ റിലീസ് ചെയ്ത ചിത്രം 'മണിയറയിലെ അശോകനിൽ' ഷൈൻ ടോം ചാക്കോ വേഷമിട്ടിരുന്നു. കോവിഡ് പ്രതിസന്ധിക്കു ശേഷം ഗൾഫ് രാജ്യങ്ങളിൽ

തിയേറ്ററിൽ റിലീസ് ചെയ്ത 'ലവ്' എന്ന ചിത്രത്തിലും ഷൈൻ നായകനായിരുന്നു.

കഴിഞ്ഞ വർഷം പുറത്തിറങ്ങിയ ലൂക്ക, പതിനെട്ടാം പടി എന്നിവയാണ് ഏറ്റവുമടുത്ത് റിലീസ് ചെയ്ത അഹാനയുടെ ചിത്രങ്ങൾ. നാൻസി റാണി എന്ന സിനിമയിലും അഹാന നായികയാണ്.