മോഹൻലാൽ വരുമോ, ഇല്ലയോ?

അവിചാരിതമായ ഹർത്താൽ ഇത്തവണ ആശങ്കയിലാക്കിയത് പൊതുജനത്തെ മാത്രമല്ല. കാത്തിരുന്ന്, കാത്തിരുന്ന് നാളെ തിയേറ്ററുകളിൽ എത്താനിരുന്ന മോഹൻലാൽ ചിത്രം ഒടിയനെ കൂടിയാണ്. പലയിടങ്ങളിലും ഫാൻ സംഘം പുലർച്ചെയുള്ള ഷോകൾക്ക് ഇരിപ്പിടം ഉറപ്പിച്ചിട്ടുണ്ടായിരുന്നു. അപ്പോഴാണ് അപ്രതീക്ഷിത വാർത്ത വരുന്നത്. സമൂഹ മാധ്യമങ്ങൾ ഊഹാപോഹങ്ങൾ കൊണ്ട് നിറഞ്ഞു. ഇതുപോലെ ഹർത്താൽ ദിനത്തിൽ റിലീസ് ഉറപ്പിച്ചിരുന്ന ബിജു മേനോൻ ചിത്രം ആനക്കള്ളൻ വൈകുന്നേരം ആറു മണിക്ക് തിയേറ്ററിലെത്തിച്ച ചരിത്രം ഓർത്തെടുത്തായിരുന്നു ഒരു ഭാഗത്തെ ആശങ്ക. എന്നാൽ തീരുമാനിച്ച പ്രകാരം അന്യ ഭാഷകളിലെ റിലീസ് നടന്നാൽ കഥയോ, മോഷണ വീഡിയോയോ മറ്റും കേരളത്തിലും എത്തുമോ എന്ന് ഭയന്ന് മറ്റൊരു വിഭാഗം. എന്തിനേറെ പറയുന്നു, ബി.ജെ.പി. ഫേസ്ബുക് പേജിൽ കേറി പൊങ്കാല ഇട്ടവരുടെ എണ്ണം തന്നെ സാക്ഷി.