State Film Awards | മമ്മൂട്ടിക്കും കുഞ്ചാക്കോ ബോബനുമൊപ്പം ഫൈനൽ വരെ ഫഹദും സൗബിനും, നടിമാരിൽ സാധ്യത നവാഗതർക്ക്

തെരഞ്ഞെടുപ്പിൽ പക്ഷപാതം, എല്ലാ ചിത്രങ്ങളും ജൂറി കണ്ടില്ല തുടങ്ങിയ ആരോപണങ്ങൾ ഒന്നും തന്നെ 2022ലെ ചലച്ചിത്ര പുരസ്‌കാര നിർണയത്തിൽ ഇതുവരെയും ഉയർന്നു കേട്ടില്ല. ജൂറി അംഗങ്ങൾ മുന്നോട്ടു വയ്ക്കുന്ന കണ്ടെത്തലുകളും, നിർദേശങ്ങളും വേണ്ടത്ര പ്രാധാന്യത്തോടെ പരിഗണിക്കുന്ന നിലപാടാണ് ചെയർമാൻ ഗൗതം ഘോഷ് കൈക്കൊണ്ടതെന്നാണ് ലഭ്യമായ വിവരം.

ബംഗാളി ചലച്ചിത്രകാരൻ ഗൗതം ഘോഷ് ആണ് ഇക്കുറി ജൂറി ചെയർമാൻ. പ്രാഥമിക ജഡ്ജിംഗ് പാനലിന്റെ രണ്ട് ഉപസമിതികൾക്ക് നേതൃത്വം നൽകിയത് ചലച്ചിത്രകാരന്മാരായ നേമം പുഷ്പരാജ്, കെ.എം. മധുസൂദനൻ എന്നിവരാണ്. ഇരുവരും അന്തിമ ജഡ്ജിങ് പാനൽ അംഗങ്ങൾ കൂടിയാണ്. പ്രാഥമിക പാനലിൽ എഴുത്തുകാരായ വി.ജെ. ജെയിംസ്, കെ.എം. ഷീബ, കലാസംവിധായകൻ റോയ് പി. തോമസ്, നിർമാതാവ് ബി. രാകേഷ്, സംവിധായകൻ സജാസ് റഹ്മാൻ, എഡിറ്ററും സംവിധായകനുമായ വിനോദ് സുകുമാരൻ എന്നിവർ അംഗങ്ങളാണ്.