പോക്കറ്റടിക്കാരന് ചാൾസ് എന്റർപ്രൈസസിൽ എന്താ കാര്യം? ഉർവശിയും ഗുരു സോമസുന്ദരവും ഞെട്ടിക്കുമോ?

‘ചാൾസ് എന്റർപ്രൈസസ്’ ജന്മനായുള്ള നിശാന്ധത മൂലം ബുദ്ധിമുട്ടുന്ന കൊച്ചിയിലെ യുവാവായ രവി കുമാരസ്വാമിയുടെ ജീവിതത്തിന്റെ ചിത്രീകരണമാണ്. അഗാധ ഭക്തയായ മാതാവ് ഗോമതിയിൽ നിന്ന് രവി ഒരു ഗണേശ വിഗ്രഹം മോഷ്ടിക്കുകയും പിന്നീട് തുടർന്നുള്ള പ്രതിസന്ധികളെ തരണം ചെയ്യാനും തന്റെ ജീവിതം വീണ്ടെടുക്കാനും ശ്രമിക്കുന്നതുമാണ് ഇതിവൃത്തം. ഇത് കോവിഡ് പകർച്ചവ്യാധി ബാധിച്ച സാമൂഹിക സാഹചര്യം കാരണം കൂടുതൽ ബുദ്ധിമുട്ടാകുന്നു.

മെയ് 19ന് പ്രദർശനത്തിനെത്തുന്ന ‘ചാൾസ് എന്റർപ്രൈസസിന്റെ’ അന്താരാഷ്ട്ര വിതരണാവകാശം റിലയൻസ് എന്റർടൈൻമെന്റ് സ്വന്തമാക്കി. കേരളം, ഗൾഫ് രാജ്യങ്ങൾ ഒഴികെയുള്ളയിടങ്ങളിലാണ് റിലയൻസ് എന്റർടൈൻമെന്റ് സിനിമ റിലീസ് ചെയ്യുന്നത്.

ഗൾഫ് വിതരണാവകാശം എപി ഇന്റർനാഷണൽ നേരത്തെ സ്വന്തമാക്കിയിരുന്നു. മറ്റുരാജ്യങ്ങളിലെ സെൻസർ സംബന്ധിച്ച കാര്യങ്ങൾ നടക്കുന്നതിനാലാണ് റിലീസ് തീയതി മെയ്‌ പത്തൊമ്പതിലേക്ക് മാറ്റിയത്. റിലയൻസ് എന്റർടൈൻമെന്റ്സിന് അറുപതിൽപരം രാജ്യങ്ങളിൽ തിയേറ്റർ സൗകര്യങ്ങളുണ്ട്.

പാ രഞ്ജിത്ത് സിനിമകളിലൂടെ ശ്രദ്ധേയനായ കലൈയരസൻ, ആഭിജ ശിവകല, സുജിത് ശങ്കർ, അൻസൽ പള്ളുരുത്തി, സുധീർ പറവൂർ, മണികണ്ഠൻ ആചാരി, മാസ്റ്റർ വസിഷ്ട്ട്, ഭാനു, മൃദുല, ഗീതി സംഗീത, സിജി പ്രദീപ്, അജിഷ, ആനന്ദ്ബാൽ എന്നിവരാണ് മറ്റു പ്രധാന അഭിനേതാക്കൾ.

ജോയ് മൂവി പ്രൊഡക്ഷൻസിന്റെ ബാനറിൽ ഡോക്ടർ അജിത് ജോയ്, അച്ചുവിജയൻ എന്നിവർ ചേർന്നു നിർമ്മിക്കുന്ന ഈ ചിത്രത്തിന്റെ ഛായാഗ്രഹണം സ്വരൂപ് ഫിലിപ്പ് നിർവ്വഹിക്കുന്നു.

അന്‍വര്‍ അലി, ഇമ്പാച്ചി, നാച്ചി, സംഗീത ചേനംപുല്ലി എന്നിവര്‍ എഴുതിയ വരികൾക്ക് സുബ്രഹ്മണ്യന്‍ കെ.വി. സംഗീതം പകരുന്നു. സഹനിര്‍മ്മാണം-പ്രദീപ് മേനോന്‍, അനൂപ് രാജ്; എഡിറ്റിംഗ് -അച്ചു വിജയന്‍, പശ്ചാത്തല സംഗീതം- അശോക് പൊന്നപ്പൻ, നിര്‍മ്മാണ നിര്‍വഹണം -ദീപക് പരമേശ്വരന്‍, കലാസംവിധാനം- മനു ജഗദ്, വസ്ത്രാലങ്കാരം – അരവിന്ദ് കെ.ആര്‍., മേക്കപ്പ്- സുരേഷ്, പി.ആർ.ഒ. -എ.എസ്. ദിനേശ്.