Jana Nayagan| 'കുതിക്കുന്നതിന് മുൻപ് സിംഹം പോലും രണ്ടടി പിന്നോട്ട് മാറാറുണ്ട്'; വിജയ് ചിത്രം ജനനായകന്റെ റിലീസ് മാറ്റി

Published by:Rajesh V
news18-malayalam

Last Updated:Jan 08, 2026 6:25 AM IST

'കുതിക്കുന്നതിന് മുൻപ് സിംഹം പോലും രണ്ടടി പിന്നോട്ട് മാറാറുണ്ട്'- എന്ന കുറിപ്പോടെയാണ് റിലീസ് മാറ്റിയ അറിയിപ്പ് പുറത്തുവിട്ടത്

ചെന്നൈ: തമിഴ് സൂപ്പർതാരം വിജയ്‌യുടെ അവസാന ചിത്രമെന്ന വിശേഷണത്തോടെ എത്തുന്ന ‘ജനനായകന്റെ’ റിലീസ് മാറ്റിവച്ചു. ചിത്രത്തിന് സെൻസർ സർട്ടിഫിക്കറ്റ് നൽകാൻ വൈകുന്നതിനെതിരെ നിർമാതാക്കൾ നൽകിയ ഹർജിയിൽ മദ്രാസ് ഹൈക്കോടതി ജനുവരി 9ന് (വെള്ളിയാഴ്ച) രാവിലെ വിധി പറയാൻ മാറ്റിയിരുന്നു. ചിത്രം റിലീസ് ചെയ്യാൻ നിശ്ചയിച്ചിരിക്കുന്നതും അതേ ദിവസം തന്നെയായിരുന്നു. ഇതോടെ ആരാധകർ ആശങ്കയിലായി. ഇതിനു പിന്നാലെയാണ് റിലീസ് മാറ്റിവച്ചതായി അണിയറ പ്രവർത്തകർ അറിയിച്ചത്. 'കുതിക്കുന്നതിന് മുൻപ് സിംഹം പോലും രണ്ടടി പിന്നോട്ട് മാറാറുണ്ട്'- എന്ന കുറിപ്പോടെയാണ് റിലീസ് മാറ്റിയ അറിയിപ്പ് പുറത്തുവിട്ടത്. പുതിയ തീയതി ഉടൻ പ്രഖ്യാപിക്കുമെന്നും നിർമാതാക്കൾ വ്യക്തമാക്കി.

സെൻസർ ബോർഡ് നിർദേശിച്ച 27 മാറ്റങ്ങൾ വരുത്തിയിട്ടും സർട്ടിഫിക്കറ്റ് നൽകാൻ തയാറാകാത്തതിനെ തുടർന്നാണ് നിർമാതാക്കൾ കോടതിയെ സമീപിച്ചത്. എന്നാൽ, മതവികാരം വ്രണപ്പെടുത്തുന്ന സീനുകൾ ഉണ്ടെന്നും സായുധസേനയെ മോശമായി ചിത്രീകരിച്ചുവെന്നും ആരോപിച്ച് പരാതികൾ ലഭിച്ചതിനാൽ ചിത്രം റിവൈസിങ് കമ്മിറ്റിയുടെ പരിശോധനയ്ക്ക് വിട്ടിരിക്കുകയാണെന്നുമാണ് ബോർഡിന്റെ വിശദീകരണം.

അനാവശ്യമായ കാലതാമസം തങ്ങൾക്ക് വലിയ സാമ്പത്തിക നഷ്ടമുണ്ടാക്കുമെന്ന് നിർമാതാക്കൾ കോടതിയെ അറിയിച്ചു. കേസ് പരിഗണിച്ച ജസ്റ്റിസ് പി ടി ആശ, ലഭിച്ച പരാതികളുടെ വിശദാംശങ്ങൾ ഹാജരാക്കാൻ ബോർഡിനോട് നിർദേശിച്ചു. 500 കോടി രൂപ ബജറ്റിൽ നിർമിച്ച ചിത്രം 5000 തിയറ്ററുകളിൽ റിലീസ് ചെയ്യാനാണ് പദ്ധതിയെങ്കിലും നിലവിലെ നിയമപോരാട്ടം വലിയ തടസമായി മാറിയിരുന്നു. ശിവകാർത്തികേയന്റെ ‘പരാശക്തി’ എന്ന ചിത്രത്തിന് വേണ്ടി ഡിഎംകെ സർക്കാർ ‘ജനനായകന്റെ’ റിലീസ് വൈകിപ്പിക്കുകയാണെന്ന് വിജയ് ആരാധകർ ആരോപിച്ചിരുന്നു.

Summary: The release of ‘Jana Nayagan’, touted as Tamil superstar Vijay’s final film, has been officially postponed. The Madras High Court had earlier deferred its verdict to the morning of January 9 (Friday) regarding a petition filed by the producers against the delay in issuing a censor certificate. Since the film was originally scheduled to hit screens on the very same day, fans were left in a state of deep concern.