ചൈന കടന്നുകയറ്റം നടത്തിയിട്ടില്ലെങ്കിൽ നമ്മുടെ 20 സൈനികർ എങ്ങനെ രക്തസാക്ഷികളായി? സർക്കാരിനെതിരെ സോണിയ ഗാന്ധി

ലഡാക്കിൽ രക്തസാക്ഷികളായ സൈനികർക്ക് ആദരം അര്‍പ്പിച്ചു കൊണ്ട് കോൺഗ്രസ് പാർട്ടി ആരംഭിച്ച 'SpeakUpForOurJawans' ക്യാംപെയ്നുമായി ബന്ധപ്പെട്ട് പോസ്റ്റു ചെയ്ത വീഡിയോ സന്ദേശത്തിലാണ് സർക്കാരിനെതിരെ പാർട്ടി അധ്യക്ഷയുടെ വിമർശനങ്ങൾ. 'പ്രധാനമന്ത്രി പറയുന്നത് പോലെ ഇന്ത്യൻ ഭൂപ്രദേശത്ത് ചൈന കടന്നുകയറ്റം നടത്തിയിട്ടില്ലെങ്കിൽ നമ്മുടെ ഇരുപത് സൈനികർ എങ്ങനെയാണ് രക്തസാക്ഷിത്വം വരിച്ചത്? പ്രധാനമന്ത്രി അവകാശപ്പെടുന്നത് പോലെ ലഡാക്കിലുള്ള നമ്മുടെ ഭൂമി ചൈന പിടിച്ചെടുത്തിട്ടില്ലായെന്ന് അറിയാൻ രാജ്യം ആഗ്രഹിക്കുന്നു.. ഇന്ത്യ-ചൈന അതിർത്തിയിൽ സങ്കീർണ്ണമായ സാഹചര്യം നിലനിൽക്കുമ്പോൾ, അതിർത്തികൾ സുരക്ഷിതമാക്കുക എന്ന ഉത്തരവാദിത്തത്തിൽ നിന്ന് കേന്ദ്ര സര്‍ക്കാരിന് ഒഴിഞ്ഞ് നിൽക്കാനാവില്ല..' സന്ദേശത്തിൽ സോണിയ പറയുന്നു.

'എപ്പോൾ എങ്ങനെയാണ് ലഡാക്കിലെ നമ്മുടെ ഭൂമി ചൈനയിൽ നിന്നും മോദി സർക്കാർ തിരികെ പിടിക്കുക? ലഡാക്കിലെ നമ്മുടെ സമഗ്ര ഭൂപ്രദേശത്ത് ചൈന ലംഘനം നടത്തിയിട്ടുണ്ടോ ? അതിർത്തിയിലെ സാഹചര്യത്തെ പറ്റി പ്രധാനമന്ത്രി ജനങ്ങളെ വിശ്വാസത്തിലെടുക്കുമോ ? സോണിയ ഗാന്ധി ചോദിക്കുന്നു.. സൈന്യത്തിന് പൂർണ്ണ പിന്തുണയും കരുത്ത് സര്‍ക്കാർ നൽകണമെന്നും അതാണ് ശരിയായ ദേശസ്നേഹമെന്നും അവർ കൂട്ടിച്ചേർത്തു.