വിമാനത്താവളങ്ങളില്‍ വ്യാജബോംബ് ഭീഷണി സന്ദേശം അയക്കുന്നവര്‍ക്ക് അഞ്ച് വര്‍ഷം വരെ യാത്രാ വിലക്ക്

പുതിയ നിര്‍ദ്ദേശം കേന്ദ്ര സിവില്‍ ഏവിയേഷന്‍ മന്ത്രാലയത്തിന് സമര്‍പ്പിക്കുമെന്നും ബിസിഎഎസ് അധികൃതര്‍ പറഞ്ഞു. ഒരു എയര്‍ലൈനിനെ മാത്രം ബാധിക്കുന്ന കേസുകളില്‍ കുറ്റക്കാര്‍ക്ക് 3 മുതല്‍ 6 മാസം വരെ താല്‍ക്കാലിക യാത്രാവിലക്ക് ഏര്‍പ്പെടുത്താനും നിര്‍ദ്ദേശമുണ്ട്. വ്യാജ ഫോണ്‍കോളുകളും ഭീഷണി സന്ദേശങ്ങളും സംബന്ധിച്ച വിഷയത്തില്‍ നിലവില്‍ ബിസിഎഎസ് വിശദമായ അന്വേഷണം നടത്തിവരികയാണ്.

മൂന്ന് രീതിയിലാണ് സാധാരണയായി പ്രതികള്‍ ഭീഷണി സന്ദേശം അയയ്ക്കുന്നത്. ഫോണ്‍കോള്‍, ഇമെയില്‍ വഴിയാണ് ചിലര്‍ ഭീഷണി സന്ദേശം അയയ്ക്കുന്നത്. ചിലര്‍ എയര്‍പോര്‍ട്ടിലെ ശുചി മുറികളിലോ വിമാനങ്ങളുടെ ടോയ്‌ലറ്റിലോ ഭീഷണി സന്ദേശം എഴുതിയ കുറിപ്പുകള്‍ വെയ്ക്കാറുണ്ടെന്നും അന്വേഷണത്തില്‍ വ്യക്തമായി. ആദ്യത്തെ രണ്ട് രീതികളില്‍ വരുന്ന ഭീഷണി സന്ദേശങ്ങളിലും പ്രതികളെ സാങ്കേതിക വിദ്യയുടെ സഹായത്തോടെ പിടികൂടാനാകും. എന്നാല്‍ മൂന്നാമത്തെ സാഹചര്യത്തില്‍ പ്രതികളെ കണ്ടെത്തുക വിഷമകരമായിരിക്കും. കഴിഞ്ഞ ദിവസം നിരവധി എയര്‍പോര്‍ട്ടുകളില്‍ വ്യാജ ബോംബ് ഭീഷണി സന്ദേശം എത്തിയിരുന്നു. തുടര്‍ന്ന് വിശദമായ അന്വേഷണത്തിന് ശേഷമാണ് വിമാനങ്ങള്‍ പുറപ്പെട്ടത്. ഇത് മൂലം മണിക്കൂറുകളോളമാണ് യാത്രക്കാര്‍ വിമാനത്താവളങ്ങളില്‍ കുടുങ്ങിക്കിടന്നത്.

Summary: The bureau of civil aviation security (BCAS) said it is mulling a five-year flying ban on individuals across all airlines if they are found guilty of making hoax bomb threat calls to airlines or airport operators.