യെച്ചൂരിയുടെ വാദം തള്ളി; സിപിഎം വിശാലസഖ്യത്തിനില്ല

ന്യൂഡൽഹി: 2019 ലോക്‌സഭാ തെരഞ്ഞെടുപ്പിൽ വിശാല സഖ്യത്തിനില്ലെന്ന് സിപിഎം. ഡൽഹിയിൽ ചേരുന്ന കേന്ദ്ര കമ്മിറ്റി യോഗത്തിലാണ് സിപിഎം വിശാല സഖ്യം വേണ്ടെന്ന് തീരുമാനിച്ചത്. ലോക്സഭാ തെരഞ്ഞെടുപ്പിൽ സഹകരണമാകാം എന്ന ജനറൽ സെക്രട്ടറിയുടെ നിലപാട് യോഗം തള്ളുകയായിരുന്നു. അതത് സംസ്ഥാനങ്ങളിലെ സാഹചര്യങ്ങൾക്ക് അനുസരിച്ച് സഖ്യം സംബന്ധിച്ച് തീരുമാനമെടുക്കാമെന്നാണ് തീരുമാനം. ഹൈദരാബാദ് പാർട്ടി കോൺഗ്രസ് തീരുമാനങ്ങൾക്ക് എതിരാണതെന്ന് കാരാട്ട് പക്ഷം നിലപാടെടുത്തു. ബംഗാളിൽ സഖ്യം വേണമെന്ന സംസ്ഥാന ഘടകത്തിന്റെ ആവശ്യവും തള്ളി. എന്നാൽ ബംഗാളിലെ സഖ്യസാധ്യത അടുത്ത കേന്ദ്രകമ്മിറ്റി യോഗത്തിൽ വിശദമായി ചർച്ച ചെയ്യാമെന്ന് ധാരണയായതായാണ് വിവരം.