പഹല്‍ഗാം ഭീകരാക്രമണത്തെ തുടര്‍ന്നുള്ള ഇന്ത്യ-പാക് സംഘര്‍ഷങ്ങളോട് മുസ്ലീം രാഷ്ട്രങ്ങളുടെ പ്രതികരണമെന്ത്?

ഇന്ത്യയ്ക്കും പാകിസ്ഥാനുമിടയിലെ പിരിമുറുക്കങ്ങള്‍ കുറയ്ക്കാന്‍ ഇറാന്‍ ഇതിനോടകം തന്നെ മധ്യസ്ഥ ശ്രമങ്ങള്‍ നടത്തി തുടങ്ങിയിട്ടുണ്ട്. വിഷയത്തിൽ പാകിസ്ഥാനെ പിന്തുണയ്ക്കുന്നതിന് പകരം നിഷ്പക്ഷ കക്ഷിയായി നിലകൊള്ളുകയാണ് ചെയ്തിരിക്കുന്നത്.

വളരെ കൃത്യവും പ്രായോഗികവുമായുള്ള ഒരു നിലപാടാണ് വിഷയത്തില്‍ സൗദി അറേബ്യ സ്വീകരിച്ചുവരുന്നതെന്ന് ഒരു വൃത്തം അറിയിച്ചു. "ശക്തമായ പരസ്യ പ്രസ്താവനകള്‍ അവര്‍ പുറത്തിറക്കിയിട്ടില്ല. മുമ്പും പരമ്പരാഗത സഖ്യകക്ഷിയായ പാകിസ്ഥാനുമായും നിര്‍ണായക സാമ്പത്തിക പങ്കാളിയായ ഇന്ത്യയുമായും അവര്‍ ബന്ധം സന്തുലിതമായി നിലനിര്‍ത്തുകയാണ് ചെയ്തിട്ടുള്ളത്," അദ്ദേഹം പറഞ്ഞു.

ഖത്തര്‍ പാകിസ്ഥാനെ ഇതുവരെയും പരസ്യമായി പിന്തുണച്ചിട്ടില്ല. 2017-2021 ഗള്‍ഫ് ഉപരോധത്തില്‍ നിന്ന് കരകയറുന്നതിലും പ്രാദേശിക തര്‍ക്കങ്ങളില്‍ നിഷ്പക്ഷത പാലിക്കുന്നതിലുമാണ് അവര്‍ ശ്രദ്ധ കേന്ദ്രീകരിച്ചിരിക്കുന്നത്. ആര്‍ട്ടിക്കിള്‍ 370 റദ്ദാക്കിയപ്പോള്‍ മറ്റ് ഗള്‍ഫ് രാജ്യങ്ങളെപ്പോലെ ഖത്തര്‍ ഇന്ത്യയെ അപലപിക്കുന്നത് ഒഴിവാക്കുകയും പരസ്പരമുള്ള ചര്‍ച്ചകള്‍ക്ക് ഊന്നല്‍ നല്‍കുകയും ചെയ്തു.

പഹല്‍ഗാം ഭീകരാക്രമണത്തിന് പിന്നാലെ സിന്ധുനദീജല ഉടമ്പടി താത്കാലികമായി മരവിപ്പിക്കാനുള്ള ഇന്ത്യയുടെ തീരുമാനത്തെ യുഎഇ വിമര്‍ശിച്ചിരുന്നു. എന്നാല്‍, പാകിസ്ഥാനെ പിന്തുണയ്ക്കുന്നതില്‍ നിന്ന് അവര്‍ വിട്ടുനിന്നു.

കശ്മീര്‍ വിഷയത്തില്‍ തുര്‍ക്കി എക്കാലത്തും പാകിസ്ഥാനെയാണ് പിന്തുണച്ചു വരുന്നത്. എന്നാല്‍, തുര്‍ക്കിയുടെ ഇന്ത്യയുമായുള്ള വ്യാപാരം വർഷംതോറും വര്‍ധിച്ചുവരികയാണ്. 2024ല്‍ 10 ബില്ല്യണ്‍ ഡോളറിന്റെ വ്യാപാരമാണ് അവര്‍ ഇന്ത്യയുമായി നടത്തിയത്. അതിനാല്‍ അവര്‍ പരിമിതികള്‍ നേരിടുന്നുണ്ടെന്ന് വൃത്തങ്ങള്‍ പറഞ്ഞു.