ഇന്ത്യ-യുഎസ് വ്യാപാര കരാർ: കർഷകരുടെ താൽപര്യങ്ങൾ പൂർണമായും സംരക്ഷിക്കപ്പെടുമെന്ന് മന്ത്രി ശിവരാജ് സിംഗ് ചൗഹാൻ

ഇന്ത്യയിൽ ജനസംഖ്യയുടെ പകുതിയിലധികം കൃഷിയെ ആശ്രയിച്ചു കഴിയുന്നവരാണെന്നും അതിനാൽത്തന്നെ അമേരിക്കൻ ഉൽപന്നങ്ങളുടെ വരവ് ചെറുകിട കർഷകരെ ബാധിക്കുമെന്നുമുള്ള ആശങ്കയ്ക്ക് മറുപടിയായി, വിദേശ ഉൽപന്നങ്ങളുടെ പെട്ടെന്നുള്ള കടന്നുകയറ്റങ്ങളോ തടസ്സങ്ങളോ ഇന്ത്യൻ വിപണിയിൽ ഉണ്ടാകില്ലെന്ന് മന്ത്രി ഉറപ്പുനൽകി. ഇന്ത്യൻ കർഷകർക്ക് ദോഷകരമാകുന്ന രീതിയിൽ ഒരു വിപണിയും തുറന്നുകൊടുത്തിട്ടില്ല. അമേരിക്കൻ കാർഷിക ഉൽപന്നങ്ങൾക്ക് കൂടുതൽ വിപണി ലഭിക്കുമെന്ന യു‌ എസ് ട്രഷറി സെക്രട്ടറിയുടെ ട്വീറ്റ് സൃഷ്ടിച്ച ആശയക്കുഴപ്പത്തിന് വാണിജ്യ മന്ത്രി പീയൂഷ് ഗോയൽ പാർലമെന്റിൽ കൃത്യമായ മറുപടി നൽകിയിട്ടുണ്ടെന്നും ശിവരാജ് സിംഗ് ചൗഹാൻ പറഞ്ഞു.

കരാറിലൂടെ തുറന്നുകിട്ടുന്ന കയറ്റുമതി സാധ്യതകളെക്കുറിച്ച് പരാമർശിക്കവെ, നിലവിൽ അമേരിക്ക ഉൾപ്പെടെയുള്ള നിരവധി രാജ്യങ്ങളിലേക്ക് ഇന്ത്യ അരി കയറ്റുമതി ചെയ്യുന്നുണ്ടെന്നും അടുത്തിടെ ഏകദേശം 63,000 കോടി രൂപയുടെ കയറ്റുമതി രേഖപ്പെടുത്തിയതായും മന്ത്രി ചൂണ്ടിക്കാട്ടി. നികുതി കുറയുന്നത് ഇന്ത്യയുടെ അരി, സുഗന്ധവ്യഞ്ജനങ്ങൾ, വസ്ത്രങ്ങൾ എന്നിവയുടെ കയറ്റുമതിക്ക് നേരിട്ട് ഗുണകരമാകും. തുണിത്തരങ്ങളുടെ കയറ്റുമതിയിലെ വർധന ദശലക്ഷക്കണക്കിന് പരുത്തി കർഷകർക്ക് സഹായകമാകും. പ്രതിപക്ഷം തെറ്റായ വിവരങ്ങൾ പ്രചരിപ്പിക്കുന്നുണ്ടെങ്കിലും, ഈ കരാർ ഇന്ത്യൻ കർഷകരുടെ താൽപ്പര്യത്തിനുവേണ്ടിയാണെന്നും പുതിയ കയറ്റുമതി സാദ്ധ്യതകൾ തുറക്കുമെന്നും മന്ത്രി ഉറപ്പിച്ചു പറഞ്ഞു.

കാർഷിക മേഖലയുടെ വ്യാപ്തി കണക്കിലെടുത്ത് കർഷകർക്കിടയിൽ ആശയക്കുഴപ്പമോ ഭീതിയോ ഉണ്ടാകാതിരിക്കാൻ വ്യക്തമായ ആശയവിനിമയം ആവശ്യമാണെന്ന് ചൗഹാൻ പറഞ്ഞു. "കർഷകർ നമ്മുടെ അന്നദാതാക്കളാണ്, അവരുടെ ക്ഷേമമാണ് രാജ്യത്തിന്റെ ക്ഷേമം. അവരുടെ താൽപ്പര്യങ്ങൾ ഇവിടെ പൂർണ്ണമായും സുരക്ഷിതമാണ്." അദ്ദേഹം ആവർത്തിച്ചു. കർഷകരെ സേവിക്കുന്നത് ഈശ്വരസേവയ്ക്ക് തുല്യമാണെന്ന് വൈകാരികമായി പറഞ്ഞ മന്ത്രി, മോദി ഗവണ്മെന്റ് ഓരോ ചുവടിലും കർഷകർക്കൊപ്പം ഉറച്ചുനിൽക്കുമെന്നും കൂട്ടിച്ചേർത്തു.