'ഇന്ദിരാഗാന്ധിയെ ഇടത് ഗ്രൂപ്പുകൾ പിന്തുണച്ചിരുന്നു;നക്സലിസം അവസാനിപ്പിച്ചത് മോദി സർക്കാർ'; അമിത് ഷാ

നക്സലിസത്തിന്റെ വ്യാപനം പതിറ്റാണ്ടുകൾക്ക് മുമ്പ് ആരംഭിച്ചതാണെന്നും മുൻ ഭരണകൂടങ്ങളുടെ കാലത്താണ് ഇത് ആഴത്തിലായതെന്നും അദ്ദേഹം ആരോപിച്ചു. മുൻ പ്രധാനമന്ത്രി ഇന്ദിരാഗാന്ധിയുടെ കാലത്ത് മുന്നറിയിപ്പുകൾ ഫലപ്രദമായി പരിഹരിക്കപ്പെടാഞ്ഞത് മാവോയിസ്റ്റ് പ്രസ്ഥാനം വളരാൻ കാരണമായെന്നും ഇന്ത്യയിൽ നക്സലിസത്തിന് അന്ത്യം കുറിച്ചത് മോദി സർക്കാരാണെന്നും അദ്ദേഹം പറഞ്ഞു.

നക്സലിസത്തിന്റെ മൂലകാരണം വികസനത്തിനായുള്ള ദാഹമല്ലെന്നും മറിച്ച് 1970-ലെ പ്രസിഡന്റ് തിരഞ്ഞെടുപ്പിൽ വിജയിക്കുന്നതിനായി ഇന്ദിരാഗാന്ധി സ്വീകരിച്ച ഒരു പ്രത്യയശാസ്ത്രമാണെന്നും ഷാ പറഞ്ഞു. ഈ ഇടത് പ്രത്യയശാസ്ത്രം കാരണമാണ് നക്സലിസം വ്യാപിച്ചതെന്ന് അദ്ദേഹം ആരോപിച്ചു. ഛത്തീസ്ഗഡ്, ജാർഖണ്ഡ്, ഒഡീഷ, മഹാരാഷ്ട്ര എന്നിവയുൾപ്പെടെ ഒരു ഡസനോളം സംസ്ഥാനങ്ങൾ നക്സലിസത്തിന്റെ പിടിയിലായിരുന്നുവെന്നും ഇത് 'റെഡ് കോറിഡോർ' എന്നാണ് അറിയപ്പെട്ടിരുന്നതെന്നും അദ്ദേഹം ചൂണ്ടിക്കാട്ടി. അവിടെ നിയമവാഴ്ച അവസാനിച്ചിരുന്നുവെന്നും കോടിക്കണക്കിന് ആളുകൾ ദാരിദ്ര്യത്തിൽ കഴിയുകയും ആയിരക്കണക്കിന് യുവാക്കളുടെ ജീവൻ നഷ്ടപ്പെടുകയും ചെയ്തുവെന്ന് അദ്ദേഹം പറഞ്ഞു. സംഘർഷങ്ങൾ കാരണം ഏകദേശം 20,000 യുവാക്കൾക്ക് ജീവൻ നഷ്ടപ്പെട്ടതായാണ് കണക്കുകൾ സൂചിപ്പിക്കുന്നതെന്നും അദ്ദേഹം കൂട്ടിച്ചേർത്തു.

നക്സൽ ഗ്രൂപ്പുകൾ ഉപയോഗിക്കുന്ന ആയുധങ്ങളിൽ വലിയൊരു ഭാഗവും സുരക്ഷാ സേനയ്ക്ക് നേരെയുള്ള ആക്രമണങ്ങളിലൂടെ നേടിയതാണെന്ന് ഷാ പറഞ്ഞു. നക്സലൈറ്റുകൾ ഉപയോഗിക്കുന്ന ആയുധങ്ങളിൽ ഏകദേശം 92 ശതമാനവും പോലീസ് സേനയിൽ നിന്ന് തട്ടിയെടുത്തതാണെന്നും അദ്ദേഹം പറഞ്ഞു. രാജ്യത്ത് ഇടത് തീവ്രവാദത്തെ നേരിടുന്നതിൽ വന്ന വെല്ലുവിളിയുടെ വ്യാപ്തിയാണ് ഇത്തരത്തിലുള്ള കണക്കുകൾ സൂചിപ്പിക്കുന്നതെന്ന് ആഭ്യന്തരമന്ത്രി പറഞ്ഞു. എന്നാൽ നിലവിൽ സ്ഥിതിഗതികളിൽ വലിയ പുരോഗതിയുണ്ടെന്നും മെച്ചപ്പെട്ട ഭരണം, വികസന പദ്ധതികൾ, സുരക്ഷാ പ്രവർത്തനങ്ങൾ എന്നിവ വഴി ബാധിത പ്രദേശങ്ങളിൽ നക്സൽ ഗ്രൂപ്പുകളുടെ സ്വാധീനം കുറയ്ക്കാൻ സാധിച്ചുവെന്നും അദ്ദേഹം വ്യക്തമാക്കി.