'ഇന്ത്യയ്ക്ക് മോദി, മഹാരാഷ്ട്രയ്ക്ക് ഷിന്‍ഡേ'; ശിവസേനാ പരസ്യത്തില്‍ സംസ്ഥാന ബിജെപിയ്ക്ക് രോഷം

ശിവസേന നേതാവായ ഏക്‌നാഥ് ഷിന്‍ഡേയാണ് നിലവിലെ മഹാരാഷ്ട്ര മുഖ്യമന്ത്രി. സര്‍ക്കാര്‍ നല്‍കിയ പരസ്യമാണ് ചര്‍ച്ചകള്‍ക്ക് തുടക്കമിട്ടത്. മോദി ഫോര്‍ ഇന്ത്യ, ഷിന്‍ഡേ ഫോര്‍ മഹാരാഷ്ട്ര എന്ന തലക്കെട്ടോടെയായിരുന്നു പരസ്യം. സംസ്ഥാനത്തെ എല്ലാ പ്രമുഖ പത്രങ്ങളിലും ഈ പരസ്യം അച്ചടിച്ച് വരികയും ചെയ്തിരുന്നു.

ബിജെപി നേതാവും മുന്‍ മുഖ്യമന്ത്രിയും നിലവില്‍ മഹാരാഷ്ട്ര ഉപമുഖ്യമന്ത്രിയുമായ ദേവേന്ദ്ര ഫട്‌നാവിസിനെക്കാള്‍ ഉന്നത പദവിയിലെത്തേണ്ടയാളാണ് ഷിന്‍ഡെ എന്ന സര്‍വേ ഫലങ്ങളും പരസ്യത്തോടൊപ്പം നല്‍കിയിരുന്നു.

മഹാരാഷ്ട്രയിലെ 26.1 ശതമാനം പേരും ഷിന്‍ഡേയുടെ മുഖ്യമന്ത്രി സ്ഥാനത്തെ പിന്തുണയ്ക്കുന്നവരാണ് എന്നാണ് പരസ്യത്തില്‍ പറയുന്നത്. 23.2 ശതമാനം പേര്‍ അടുത്ത മുഖ്യമന്ത്രിയായി ദേവേന്ദ്ര ഫട്‌നാവിസ് വരണമെന്ന് ആഗ്രഹിക്കുന്നുവെന്നും പറയുന്നു.

അതേസമയം 49.3 ശതമാനം പേരും ശിവസേന-ബിജെപി സഖ്യം കൂടുതല്‍ ശക്തിയാര്‍ജിക്കണമെന്നാഗ്രഹിക്കുന്നവരാണെന്നും പരസ്യത്തില്‍ പറയുന്നു.

മഹാരാഷ്ട്രയിലും ഇതേ തന്ത്രം തന്നെ പ്രയോഗിക്കാനാണ് ബിജെപി ലക്ഷ്യമിടുന്നതെന്ന് ഉന്നത വൃത്തങ്ങള്‍ അറിയിച്ചു. ശിവസേന-ഷിന്‍ഡെ നേതൃത്വത്തിലായിരിക്കും വരാനിരിക്കുന്ന സംസ്ഥാന തെരഞ്ഞെടുപ്പ് നേരിടുകയെന്നും പാര്‍ട്ടി വൃത്തങ്ങള്‍ പറഞ്ഞു.

അതേസമയം പരസ്യത്തിലുള്‍പ്പെടുത്തിയ സര്‍വേഫലം ശിവസേന വോട്ടര്‍മാരെ സ്വാധീനിക്കുമെന്നാണ് പാര്‍ട്ടി സൂചിപ്പിക്കുന്നത്. തങ്ങള്‍ സ്വതന്ത്രമല്ലെന്നും ബിജെപിയ്ക്ക് കീഴിലുള്ള ഒരു പാര്‍ട്ടിയാണ് തങ്ങളെന്നും വിചാരിക്കുന്ന നിരവധി ശിവസേന പ്രവര്‍ത്തകരുണ്ട്. അവര്‍ക്ക് ഈ സര്‍വേ ഫലം ഊര്‍ജം നല്‍കുമെന്നും ശിവസേനവൃത്തങ്ങള്‍ പറയുന്നു.

ബിജെപി നേതാവിനെക്കാള്‍ മെച്ചപ്പെട്ടയാളാണ് ഷിന്‍ഡേയെന്ന് ഉറക്കെ പ്രഖ്യാപിക്കുന്ന പരസ്യമാണിത്. ഇതോടെ പാര്‍ട്ടിയുടെ പിന്തുണ വര്‍ധിക്കുമെന്നും കരുതുന്നു.

” ഏത് നേതാവാണ് കൂടുതല്‍ ജനകീയന്‍ എന്ന് തീരുമാനിക്കുന്നത് തെരഞ്ഞെടുപ്പ് ഫലമാണ്. കാബിനറ്റ് മന്ത്രിയെന്ന നിലയില്‍ ഷിന്‍ഡേ പ്രശസ്തനായിരുന്നു. ഇപ്പോള്‍ മുഖ്യമന്ത്രിയെന്ന നിലയിലും അദ്ദേഹം ജനസമ്മതനാണ്. സംസ്ഥാനത്തെ ജനങ്ങള്‍ക്ക് ഷിന്‍ഡേ-ഫട്‌നാവിസ്-മോദി സഖ്യത്തില്‍ വിശ്വാസമുണ്ട്. സംസ്ഥാനതലത്തിലെ നേതാവെന്ന നിലയില്‍ ഫട്‌നാവിസിന് ജനങ്ങള്‍ രണ്ട് തവണ അവസരം വല്‍കിയിട്ടുണ്ട്. ശിവസേനയും ബിജെപിയും തമ്മില്‍ യാതൊരു തര്‍ക്കവും നിലവിലില്ല,’ എന്ന് മഹാരാഷ്ട്ര ബിജെപി അധ്യക്ഷന്‍ ചന്ദ്രശേഖര്‍ ബവാന്‍കുളെ പറഞ്ഞു.

”ബാല്‍സാഹേബിന്റെ ശിവസേനയായിരുന്നു. എന്നാല്‍ ഈ പരസ്യം ഒരു കാര്യം വ്യക്തമാക്കി. ഇതിപ്പോള്‍ മോദി-ഷായുടെ ശിവസേനയാണ്,” എന്നായിരുന്നു റാവത്ത് പറഞ്ഞത്.