'ആസൂത്രിത ഗൂഢാലോചന': തിരുപ്പതി ലഡു വിവാദത്തിൽ ജഗൻ മോഹന് എതിരെ ചന്ദ്രബാബു നായിഡു

തിരുപ്പതി ക്ഷേത്രത്തിലെ ലഡു നിർമ്മാണത്തിൽ മായം കലർന്ന ചേരുവകൾ ഉപയോഗിച്ചുവെന്ന പുതിയ ആരോപണങ്ങൾ ഉയർന്ന പശ്ചാത്തലത്തിൽ, മുൻ മുഖ്യമന്ത്രി ജഗൻ മോഹൻ റെഡ്ഡിയുടെ വൈഎസ്ആർ കോൺഗ്രസിനെതിരെ ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു. വിവാദം ഒരു ആസൂത്രിത ഗൂഢാലോചനയാണെന്ന് എന്ന് അദ്ദേഹം  വാർത്താ ഏജൻസിയായ പിടിഐയോട് പറഞ്ഞു. അറിയാതെ സംഭവിക്കുന്ന തെറ്റാണെങ്കിൽ ക്ഷമിക്കാമെന്നും എന്നാൽ ബോധപൂർവ്വം ഇത്തരമൊരു കാര്യം ചെയ്യുന്നത് അംഗീകരിക്കാനാവില്ലെന്നും മുൻ വൈഎസ്ആർ കോൺഗ്രസ് സർക്കാരിനെ രൂക്ഷമായ ഭാഷയിൽ വിമർശിച്ചുകൊണ്ട് അദ്ദേഹം പറഞ്ഞു. സാധാരണ നെയ്യിന് 450 രൂപ വിലയുള്ളപ്പോൾ വെറും 230 രൂപ നൽകിയാൽ രാസവസ്തുക്കൾ കലർന്ന നെയ്യല്ലാതെ മറ്റെന്താണ് ലഭിക്കുകയെന്നും, ചില കമ്പനികൾ നെയ്യിൽ മൃഗക്കൊഴുപ്പും സസ്യക്കൊഴുപ്പും കലർത്തുന്നുണ്ടെന്നും മുഖ്യമന്ത്രി ആരോപിച്ചു.