കേന്ദ്ര മന്ത്രിസഭാ പുനഃസംഘടന ഉടൻ; വി. മുരളീധരന് ടൂറിസം വകുപ്പിന്റെ സ്വതന്ത്ര ചുമതല നൽകുമെന്ന് സൂചന

എൽജെപി, ജെഡിയു കക്ഷികളിൽ നിന്ന് മന്ത്രിമാർ ഉണ്ടാകും. എന്നാൽ കേന്ദ്രമന്ത്രിയായിരിക്കെ അന്തരിച്ച  നേതാവ് രാംവിലാസ് പാസ്വാന് പകരം എൽജെപിയിൽ നിന്ന് ആര് മന്ത്രിയാകും എന്നതിൽ വ്യക്തതയില്ല. നിലവിലെ പാർട്ടി അധ്യക്ഷനായ ചിരാഗ് പാസ്വാന് പുറമെ അടുത്ത ബന്ധുവായ പശുപതി കുമാർ പരസും മന്ത്രിസ്ഥാനത്തിനായി രംഗത്തുണ്ട്.

മഹാരാഷ്ട്രയിൽ നിന്ന് നാരായൺ റാണേ, ബിഹാർ, ഗുജറാത്ത് എന്നീ സംസ്ഥാനങ്ങളുടെ ചുമതലയുള്ള ഭൂപേന്ദ്ര യാദവ് ബംഗാൾ മുൻ അധ്യക്ഷൻ ദിലീപ് ഘോഷ് എന്നിവരും പുനഃസംഘടനയിൽ  ഇടം നേടാൻ ഏറെ സാധ്യതയുണ്ട്. അടുത്ത വർഷം നിയമസഭാ തെരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളിൽ നിന്ന് കൂടുതൽ പേർക്ക് മന്ത്രിസഭയിൽ ഇടം ലഭിക്കും. 53 അംഗ മന്ത്രിസഭയാണ് നിലവിലുള്ളത്. ഇതിൽ പ്രകടനം തൃപ്തികരമല്ലാത്ത ചില മന്ത്രിമാരെ ഒഴിവാക്കാനും സാധ്യതയുണ്ട്.