ബ്ലാക്ക് ഫംഗസിനെ നോട്ടിഫയബിൾ രോഗമായി പ്രഖ്യാപിച്ച് പശ്ചിമ ബംഗാളും

മെയ് 22 ന് ആരോഗ്യ വകുപ്പ് പുറത്തുവിട്ട പത്രക്കുറിപ്പിൽ, ബ്ലാക്ക് ഫംഗസ് റിപ്പോർട്ട് ചെയ്താൽ രോഗിയുടെ വ്യക്തിഗത വിവരങ്ങൾ ഉൾപ്പെടെ പരിശോധനാ വിവരങ്ങൾ, രോഗത്തിന്റെ മുൻകാല വിവരങ്ങൾ, മരണം സംഭവിച്ചാൽ അത് സംബന്ധിച്ച വിവരങ്ങൾ അടക്കം ഉൾപ്പെടുത്തണമെന്ന് പറയുന്നു.

കോവിഡ് ബാധിച്ചവരിൽ ബ്ലാക്ക് ഫംഗസ് പല സംസ്ഥാനങ്ങളിൽ നിന്നും റിപ്പോർട്ട് ചെയ്യപ്പെട്ടതോടെ 1897 ലെ പകർച്ചവ്യാധിനിയമ പ്രകാരം രോഗത്തെ മുന്നറിയിപ്പ് നൽകേണ്ട രോഗങ്ങളുടെ (Notifiable Diseaase) പട്ടികയിൽ പെടുത്താൻ സംസ്ഥാനങ്ങളോട് കേന്ദ്രസർക്കാർ ആവശ്യപ്പെട്ടിട്ടുണ്ട്. ഇതോടെ ബ്ലാക്ക് ഫംഗസ് എന്ന് സംശയിക്കുന്നതും നിർണ്ണയിക്കപ്പെട്ടവയുമായ കേസുകൾ ആരോഗ്യവകുപ്പിനും തുടർന്ന് ഇന്റഗ്രേറ്റഡ് ഡിസീസ് സർവൈലൻസ് പ്രോഗ്രാമിലേക്കും (IDSP: Ingegrated Disease Surviellance Programme) റിപ്പോർട്ട് ചെയ്യേണ്ടതുണ്ട്.

ബ്ലാക്ക് ഫംഗസ് രോഗം കണ്ടെത്തിയാലോ സംശയം തോന്നിയാലോ ആരോഗ്യപ്രവർത്തകർ ജില്ലാ ആരോഗ്യവകുപ്പിനെ നിർബന്ധമായി അറിയിക്കണമെന്നാണ് നിർദേശം. ബ്ലാക്ക് ഫംഗസിനെ പകർച്ചവ്യാധിയായി പ്രഖ്യാപിക്കുന്ന പത്താമത്തെ സംസ്ഥാനമാണ് പശ്ചിമബംഗാൾ.

കഴിഞ്ഞാഴ്ച്ചയാണ് പശ്ചിമബംഗാളിൽ ആദ്യ ബ്ലാക്ക് ഫംഗസ് രോഗം റിപ്പോർട്ട് ചെയ്തത്. ബ്ലാക്ക് ഫംഗസ് ബാധിച്ച് 32 വയസ്സുള്ള യുവതി മരണപ്പെട്ടിരുന്നു. കോവിഡ് ബാധിച്ച യുവതിക്ക് പിന്നീട് ബ്ലാക്ക് ഫംഗസും സ്ഥിരീകരിക്കുകയായിരുന്നു.

അതേസമയം, കേരളത്തിൽ ബ്ലാക്ക് ഫംഗസ് ബാധിച്ച് ചികിത്സയിലുള്ളവരുടെ എണ്ണം 40 ആയി. മലപ്പുറം, കോഴിക്കോട് ജില്ലകളിലാണ് കൂടുതൽ രോഗികൾ. ഇവരിൽ എങ്ങനെ ബ്ലാക്ക് ഫംഗസ് ബാധിച്ചെന്ന് കണ്ടെത്താനുള്ള ഓഡിറ്റും ആരംഭിച്ചിട്ടുണ്ട്. ഇതുവരെ കോവിഡാനന്തര ബ്ലാക്ക് ഫംഗസ് ബാധിച്ചത് 49 പേർക്കാണ്. ഇതിൽ 9 പേർ മരിച്ചു.

ബ്ലാക്ക് ഫംഗസ് ചികിത്സയ്ക്കായി അന്തർദേശീയ തലത്തിൽ അംഗീകരിച്ച പ്രോട്ടോക്കോൾ പിന്തുടരാനാണ് തീരുമാനം. മരുന്ന് ക്ഷാമം പരിഹരിക്കാനുള്ള ശ്രമങ്ങൾ ആരംഭിച്ചതായി ആരോഗ്യവകുപ്പ് അറിയിച്ചു.