'ഏറാന്മൂളികളും വിടുപണി ചെയ്യുന്നവരും പറയുന്നത് പ്രവൃത്തിക്കാനാണ് നിങ്ങൾക്ക് താല്പര്യം' കോൺഗ്രസ് നേതൃത്വത്തോട് അനിൽ ആന്റണി

കോൺഗ്രസ് പാര്‍ട്ടിയിൽ നിന്ന് വിഭിന്നമായ നിലപാട് രേഖപ്പെടുത്തിയതിന് പിന്നാലെ അനിൽ ആന്റണിക്കെതിരെ യൂത്ത് കോണ്‍ഗ്രസിലെ ഒരു വിഭാഗം ശക്തമായ വിമർശനവുമായി രംഗത്ത് വന്നിരുന്നു.

Also Read- ബിബിസി ഡോക്യുമെന്ററി വിവാദം: എ.കെ. ആന്റണിയുടെ മകൻ അനിൽ ആന്റണി കോണ്‍ഗ്രസ് വിട്ടു

‘‘കെപിസിസിയിലും എഐസിസിയിലും വഹിക്കുന്ന എല്ലാ പദവികളും ഞാൻ രാജിവയ്ക്കുന്നു. അഭിപ്രായ സ്വാതന്ത്ര്യത്തിനു വേണ്ടി വാദിക്കുന്നവർ ഒരു ട്വീറ്റിൽ അസഹിഷ്ണുക്കളായി അത് പിൻവലിക്കാൻ നിർബന്ധിക്കുന്നു. ഞാൻ ആ ആവശ്യം നിരസിച്ചു. സ്നേഹം പ്രചരിപ്പിക്കാനായി നടത്തുന്നൊരു യാത്രയെ പിന്തുണയ്ക്കുന്നവർ ഫേസ്ബുക്ക് വാളിൽ വന്ന് ചീത്ത വിളിക്കുന്നു. അതിന്റെ പേരാണ് കപടത. എന്തായാലും ജീവിതം മുന്നോട്ടുതന്നെ നീങ്ങുന്നു’ – അനിൽ ട്വീറ്റിൽ കുറിച്ചു.

ദയവായി ഇത് എന്റെ രാജിക്കത്തായി കണക്കാക്കുക

എല്ലാവരോടും നന്ദി അറിയിക്കുന്നു. പ്രത്യേകിച്ച് ഞാൻ ഇവിടെയുണ്ടായിരുന്ന ചുരുങ്ങിയ കാലയളവിൽ, വിവിധ സമയങ്ങളിൽ പൂർണ്ണമനസോടെ എന്നെ പിന്തുണയ്ക്കുകയും വഴികാട്ടുകയും ചെയ്ത കേരളത്തിലെ പാർട്ടി നേതൃത്വത്തിനും ഡോ. ശശി തരൂരടക്കം അസംഖ്യം പാർട്ടി പ്രവർത്തകർക്കും നന്ദി .

പാർട്ടിക്ക് വളരെ ഫലപ്രദമായി പല തരത്തിൽ സംഭാവന ചെയ്യാൻ എനിക്ക് സാധിച്ചു എങ്കിൽ അതിനു പിന്നിൽ അതിന് എന്നെ പ്രാപ്തനാക്കുന്ന എന്റേതായ സവിശേഷമായ ശക്തിയുണ്ടെന്നത് സത്യമാണ്. എന്നാൽ നിങ്ങളുടെ ചൊല്ലുവിളിക്കു നിൽക്കുന്ന ഏറാന്മൂളികളും വിടുപണി ചെയ്യുന്നവരും പറയുന്നത് മാത്രം കേട്ട് പ്രവൃത്തിക്കാനാണ് നിങ്ങൾക്കും നിങ്ങളുടെ സഹപ്രവർത്തകർക്കും നേതൃത്വത്തിന് ചുറ്റുമുള്ള ചെറിയ ഉപജാപകവൃന്ദത്തിനും ഇപ്പോൾ താല്പര്യം എന്ന് എനിക്ക് ഇക്കാലം കൊണ്ട് മനസിലായി. ഇത് മാത്രമായി യോഗ്യതയുടെ ഏക മാനദണ്ഡം. ഖേദകരമെന്നു പറയട്ടെ, നമുക്ക് യോജിക്കാവുന്ന ഒരു പൊതു ഇടമില്ല.

ഇന്ത്യയുടെ അടിസ്ഥാന തത്വങ്ങൾക്ക് എതിരായ വിനാശകരമായ വിവരണ പാഠങ്ങളുടെ പ്രതിലോമകതയിൽ വീഴാതെ എന്റെ പ്രൊഫഷണല്‍ കർത്തവ്യങ്ങളിൽ തുടരാനാണ് ഞാൻ ആഗ്രഹിക്കുന്നത് .

കാലം ചെല്ലുമ്പോൾ ഈ രാജ്യവിരുദ്ധത ചരിത്രത്തിന്റെ ചവറ്റുകൊട്ടയിൽ സ്ഥാനം പിടിക്കുമെന്ന് തന്നെയാണ് ഉറച്ച വിശാസം.

എല്ലാ നന്മകളും നേരുന്നു,

നന്ദി.

ആശംസകളോടെ

അനിൽ കെ ആന്റണി