അത് ബേലൂർ മഖ്‌ന;വയനാട്ടിൽ കർഷകനെ കൊന്നത് ഹാസനിൽനിന്ന് പിടികൂടി കാട്ടിലാക്കിയ ആന

മാനന്തവാടി: വയനാട്ടിൽ ഗേറ്റ് തകർത്ത് വീട്ടുമുറ്റത്ത് കയറി കർഷകനെ കൊന്ന ആനയെ തിരിച്ചറിഞ്ഞു. കർണാടകത്തിലെ ഹസനിൽനിന്ന് പിടികൂടി റേഡിയോ കോളർ ഘടിപ്പിച്ച് കാട്ടിലാക്കി ബേലൂർ മഖ്‌ന എന്ന മോഴയാനയാണ് കർഷകനെ ആക്രമിച്ചത്. മക്ന എന്നാൽ മോഴയാനയെന്നാണ് കന്നഡയിലെ അർഥം. ഇക്കഴിഞ്ഞ നവംബർ 30നാണ് ബേലൂർ മഖ്‌നയെ ഹസൻ ജില്ലയിലെ സകലേഷ്പൂർ താലൂക്കിലെ കൊല്ലഹള്ളി ഗ്രാമത്തിൽനിന്ന് കർണാടക വനംവകുപ്പ് മയക്കുവെടിവെച്ച് പിടികൂടിയത്. എട്ടുമണിക്കൂറോളം നീണ്ട പ്രയത്നത്തിന് ശേഷമാണ് അന്ന് ആനയെ പിടികൂടിയത്. മയക്കുവെടിവെച്ചിട്ടും ആന ഏറെ ദൂരം ഓടിയിരുന്നു.